Elurrik ez dugu oraino. Baina zeru-mugako mendiak zuri-zuriak dira. Lagunek argazkiak zintzilikatzen dituzte sarean eta Heleta aldeko Baigurak Himalaiako gailur bat dirudi! Goizetan, bazterrak zurbil dabiltza eta ekiak urrezko putzuak zulatzen ditu kostaldeko paisaia urbanoetan. Neguko izotza bezalakorik ez da ohiko bizitzaren erdigunetik desbideratzeko, bestela gogoetatzen hasteko.
Errobi hegitik ibili nintzen herenegun, eguerdi betean, platano arrunten itzal luzeak miresten, eguzkiari begira, haren berotasuna sentitzen nuela larrua sutzen, sei gradu baino ez zirelarik alta. Negu usaina hedatzen zen inguruan, ibaiaren xuxurlaren musika, lasterkarien urratsen klaska eta garuna zeharkatu zidan pentsamendu-tximistaren erredura. Ez nuen deus gehiagoren beharrik, hatsa eta heldu den martxoan sahatsa berriz loratuko zelako esperantza.
Igandea da eta euria dute iragartzen. Ateri bulta zabalekin haatik. Kirol zapatak janztea askiko da, negu usainaren oroitza eta kanta zahar baten melodia buruan etxetik ateratzea, zorion zerbaitez gozatzeko.
