Senpereko jenderik ahaltsuena zen, Lapurdin ere, andere puxanta. XVII. mende hastapen hartan, lider soziala, alo. Herrikideekin batera borrokatu zen Jean-Paul de Caupenne Senpereko jaunaren kontra, zeinak nahi baitzituen herri lurrak ebatsi.
Frantses koroaren zerbitzuko epaile nagusia zen De Caupenne, eta Tristan Urtubiako Jauna, armadaburua Lapurdin. Biak herritarren etsaiak. Noble ororen gisan, ez zuten eskubiderik Lapurdiko Biltzarretan parte hartzeko.
Eskuz esku lanean aritu ziren Espainiaren aldeko espioitzan, bai ere Urdazuri arroako sekta satanikoa erauztean. Urtubiak helarazi zien bere etsai politikoen zerrenda Bordeletik jin epaileei. Katalina Elizalde Mutrikurat ihesi joan zen, zartaginetik surat, espainiar Inkisizioak harrapatu baitzuen eta berriz ere frantsesen esku utzi. Orduan isildu zuten betirako bere izena eta izana: Damnatio memoriae.
Alta, ez arras, bihar estreinatuko baitute Seaskaren Senpereko kolegio berria, aintziratik zinez hurran, goraki aldarrikatuz lau haizeetara: Katalina Elizalde!
Izan baita nor.
