Pertinentzia

Zergatik koreeraz? Ez diote oso galdera pertinentea egin Bong Joon Hori Hollywooden. Bera korearra da, filma Koreari buruz egin du eta filmeko aktoreak korearrak dira. Zein zentzu izango luke Parasite filma beste hizkuntza batean egiteak? Galderaren inpertinentziak ingeles hiztunak ere aztoratu egin ditu sare sozialetan, baina badakizue, zinema industrian ingelesa da nagusi. Eta nagusiarentzat beste hizkuntza guztiak zalantzan jartzeko modukoak dira.

Eta pentsatu dut justizia karmikoa izango litzatekeela Bong Joon Horen lekuan Espainia edo Frantziako zinema zuzendari bat egotea. Arnasarik gabe gelditu arte egingo nuke barre telebistaren aurrean kazetariak galdetuko balie ea zergatik sortu duten zerbait frantsesez edo gazteleraz. Eta badakit Frantzia zein Espainiako kazetari guztiak sutan jarriko ziratekeela, eta telebistako mahai inguru kasposo guztietan aterako liratekeela ahoetatik sugeak, eta aldizkari guztiek kondenatuko lukete su eternaletara galdera egitera ausartu den kazetaria. Baina nik barre egingo nuke, barre eta barre, eta barre berriz ere, eta, haiek entzungo ez ninduketen arren, telebistari esango nioke: izorra zaitezte ganora bakook, bostehun urte baino gehiago daramatzazue euskaldunoi gauza bera galdetzen.