Esaldiak

Pazientzia izan behar dugu, bai, baina ahalik azkarren bilatu behar dugu gola», esan zion Alonsok telebistari. Jefe politikoaren kabineteko idazkarietako batek, oso saiatua bera, esaldia apuntatu zuen koadernotxoan, Alonsok gola zioen tokian irteera jarri eta gero. Berea balitz bezala pasatuko zion jefeari hurrengo bileran. Apuntatu zituen kirol tertulia batean entzundako beste perla batzuk ere. Esaldi batzuetan, egokipen laburrak egiten zituen: «Futbolean (politikan) erdiko aurrelariekin (lider petoekin) jokatzen da».«Benetako ekipo batek(nazio batek) larrialdietan forjatzen du kemena». Beste hainbat esaldi hitzez hitz zen baliagarria jefearentzat. Bi apuntatu zituen: «Hartutako neurri estrategikoen konfiantzak ekarriko digu arrakasta». «Nor gara eta errespetua zor digute, emaitza txarrek ez gaituzte kikildu behar».

Idazkaria pozik zegoen: hurbil ikusten zuen jefearen hurrengo alineazioan sartzeko aukera.