Esaten digute

Esaten digute: gure sistema ez da perfektua izango, baina non ikusi duzue demokrazia perfekturik, justizia guztiz zuzenik, bake zeharo benetakorik?

Esaten digute: demokrazia, justizia eta bakea helburuak dira, idealak, bizitza politikoaren iparra. Ez direla perfektuak? Demokrazia, justizia eta bakea pertsonek egiten dituzte: gizarte baten ibilera nolako, halakoak demokrazia, justizia eta bakea ere.

Esaten digute: demokrazia, justizia, bakea, hitzak dira. Ez dute edukirik, ez dira ezer. Guk ematen diegu edukia, guk bihurtzen ditugu duin edo zital.

Zer dontsu klase egongo da horren guztiaren kontra, nor jarriko ditu berrogeialdian hain kontsiderazio zentzuzkoak? Baina non eta noiz esan —ai, testuingurua!— , guztizko egia horiei excusatio non petita susmagarrien usaina darie. Eta benetan esan nahi digutenaren oihartzuna entzuten hasten gara: har ezazue pakete osoa guk esanda bezala eta gure baldintzetan.