Egitekoak eginda

Halaxe joan da, eta halaxe doala esan du Lula Da Silvak, oraintsu arteko Brasilgo presidenteak. Eta ez da askotan gertatuko presidente batek agurrean esana eta presidente horren agintean egon direnek haren agurrean esana bat etortzea. Horixe gertatu da Lularekin, eta horixe brasildarren gehiengoarekin —%80tik gorako onarpen indizearekin esan dio agur karguari, eta Latinoamerikak inoiz izan duen presidenterik onena da askorentzat—.

Ez da harritzekoa horregatik Dilma Rousseff presidente berriaren kargu-hartzea orain arteko presidentearen agurrak itzalpean harrapatu izana. Ez dauka zeregin erraza Rousseffek. Lularen karismarik gabekoa, pobreekiko haren enpatiarik gabekoa, eta haren aldean politizatuagoa da Rousseff. Lularen zortzi urteko agintaldian oposizioa txikituta egon da, bazter batean, lotuta eta etsita, presidentearen itzelezko entzute eta onarpenaren beldur. Orain iritsi da haien unea eta haiei (ere) egin beharko die aurre Rousseffek. Egitekoak eginda doala esateko lau urte zail ditu aurretik.