Jaurlaritzak aurkeztu berri duen etxebizitzaren lege aurreproiektuak ideia interesgarriak ditu: etxebizitzarako eskubidea aitortzea, hutsak dauden etxebizitzei kanon bat ezartzea eta alokatzera behartzea, etxebizitzak desjabetzeko aukera... Adreilu horiek behar diren moduan kokatuta, eta solairuz solairu, eraikuntza berezia egin liteke, teilaturaino. Baina duda handiak daude ze eraikin geratuko den amaieran.
Hasteko, ideiak onak izan arren, oso zehazgabeak direlako. Bestetik, kontzeptu asko PSE-EEren kide PPk ez dituelako onartuko —eta EAJk ere, nekez—. Azkenik, ez datozelako guztiz bat Jaurlaritzak berak martxan jarri dituen Etxebizitza Itunarekin eta Etxebizitzaren Plan Zuzentzailearekin. Itxura du Arriolak zunda globo moduan bota nahi izan dituela gai batzuk, jakinik haietako asko hustuko zaizkiola egitasmoaren tramiteek aurrera egin ahala.
Gauzak hala, bi gauza gerta daitezke. Logikoena: kontsentsuaren izenean aurreproiektu hau dezente aldatzea; edo, Madrazori gertatu bezala, lege ere ez bihurtzea.
