Hamar urte bete dira, gaur, Itoizko urtegia egiteko Nafarroako Gobernua etxeak hustu eta botatzen hasi zenetik. Itoitz, Artozki, Orbaitz, Gorritz, Muniain, Ezkai eta Artzi, memoriaren mapan izango dira gordeak, egun batean uraz bete eta Nafarroaren mapatik desagerrarazi zituztenetik. Itoitz ez ito zen garaiko leloetako bat, eta ito, ito zituzten, kaleak, etxeak eta zeruak. Herriak, ordea, ez zituzten ito, ez behintzat gogoratzen dituzten bitartean.
Ikur bat izan zen Itoizko urtegiaren aurkako borroka. Gau ilunean urtegia egiteko kableak moztu zituzteneko txinpartek argia eman zuten, gorde beharreko sua. Hamar urte hauetan azpiegitura erraldoi horrek ez du ekarri ez errentagarritasunik, ezta lanposturik ere, eraikitzea argudiatzerakoan aldekoek ziotenaren kontra; onurak ere, zalantzan dira. Baina hamar urte geroago beste Itoitz batzuk mehatxatzen dituzten urak asko dira. Urtegia modernitatearekin lotu zuten, gaur egun beste azpiegitura batzuk lotzen dituzten moduan. Modernitatearen kontzeptu zaharkitu bera, orain eta orain hamar urte.
Hizpideak
Modernitatea
Iruzkinak
Ez dago iruzkinik
Ordenatu
