Securitas Direct

Bada Benidormera, Cadizera, Almuñecarrera joan eta opor-egunak urbanizazioko igerilekuan pasatzen dituenik. Hondartzatik hurbil dagoen txokoren bat hautatzen dute propio, baina, hondarrarekin berdintzerik ez ei dugu nahi eta besteak zipriztintzen dituzten klorozko bonbak gustatzen zaizkigu oraindik.

Hondartza edo igerileku zaleak parez pare ipini baino urbanizazio hauek iruditzen zaizkit kuriosoak; hain kolorgeak, hain paper gainean diseinatuak, hain familiarrak. Ez dago bizilagunen lo faltaren aitzakia izan daitekeen tabernarik, haurra ogi bila bidaltzeko okindegirik, eta, hor ere, ez da kontsumorako ez den lokalik existitzen. Horren auzo homogeneoa sortzen da non bestelako gorputzen presentziak automatikoki bihurtzen du bestea beste, eta, horregatik, besteak beste, bertakoentzat segurtasuna oso balio garrantzitsua bihurtzen da.

Segurtasuna balio baino gehiago diskurtso eta gizartea egituratzen duen proiektua da, ordea; gaua, etorkinak, finantza-ekonomia... bakoitza mutur ezberdinetik, baina segurtasuna bada lotzen dituen harietako bat. Kontzeptu eta ideia gisa du arrakasta segurtasunak, eta bere izenean segurtasunik eza sortzen duten estatu penalek gure itolarriari flotagailua eskaintzen diote: mugetatik kanpo gerrak, mugen barruan polizia, norbere etxean Securitas Direct (orain, zenbait banketxek hipoteka merkatzeko baldintza gisa jarri dutena. Hahor mantxunga!).

Baina, amigo, segurtasunaren desira edo beharra edo iruzurra beti izango da bukatzen ez dena eta joan-etorrikoa; itsasoaren modura.