Umezurtz

Blas de Oterok bidaia bat egin zuen Txinara 60ko hamarkadan, Idazleen Nazioarteko Elkarteak gonbidatuta. «Pixka bat orientatzera» zihoala idatzi zuen Oterok, ez ironiarik gabe, poema ezagun batean. Maoismoaren garaiak ziren, Liburu Gorriarenak, Iraultza Kulturalarenak. La Cina è vicina (Txina hurbil dago) pelikula egin zuen Marco Bellocchiok, maoismoaren itzal gero eta luzeagoaz Italiako/Europako politikan eta bizitza egunerokoan. Mendebaleko korronte aurrerakoienak Orientera (Ekialdera) begira zeuden, maoismoak, hinduismoak, budismoak argi pixka egingo zutelakoan hemengo ilunpean.

Mundua asko aldatu da ordutik. Bai Mendebala eta bai Ekialdea; komunismoa eta kapitalismoa. Txinako agintari nagusia eta Obama elkarrekin ikusi ditugu egunotan, globalizazioa eta orden berria izan dituzte hizpide: etorkizuna zein potentziak gidatuko dute jokoan.

Ezkerrak umezurtz segitzen du, ez dakielarik nora jo «pixka bat orientatzera».