Atarrabiako Udalak euskararen ordenantza urardotu du

Atarrabiako Udalak Euskararen Ordenantza 2011ko urriaren 25etik dauka indarrean. Zioen azalpenean, hauxe adierazita dauka: «Ordenantza honen helburu orokorra da Udalaren baliabideak lanean jartzea, gizarte elebiduna sustatzeko, Atarrabiako hiritarrei udal zerbitzuak euskaraz emango zaizkiela bermatuz, eta euskararen erabilera areagotzeko esparru sozialak sortuz edota sustatuz». Udaleko lanpostuen hizkuntz profila eta gradua ezartzeko irizpide orokor hauek ezarri zituen:

a) Euren eginkizun nagusien artean herritarrekin harreman zuzena izatea duten plantilla organikoko lanpostuetan, maila edozein delarik ere, euskara jakitea derrigorrezkoa izanen da.

b) Plantilla organikoko A mailako lanpostuetan C1 graduaren ezagutza baliokidea eskatuko da; B mailakoetan B2 graduarena, eta C mailakoetan, gutxienez, B1 graduaren ezagutza baliokidea.

c) Aurreko irizpideen arabera derrigorrezkotasuna ezarrita ez duten plantilla organikoko E eta D mailetako lanpostuetan euskara meritu gisa baloratuko da. Lehiaketarik gabeko oposizioan, euskara jakitea derrigorrezkoa izanen da».

Arauak horiek izanik, 2017an lan deialdi batzuk iritsi ziren: haur hezitzaileen zerrendak osatzeko eta zerbitzu anitzetako ofizial izateko oposizio-lehiaketa murriztua (biak C mailakoak). Atarrabiako Udalaren interpretazioa hau izan da: Ez da beharrezkoa B1 graduko euskararen ezagutza. Antza denez, beharrezkotasun bakarra herritarrekin harreman zuzena duten lanpostuetan dago soilik. Hasieratik saihets zitzakeen jarritako helegiteak, ordenantza argiago jarri izan balu. Euskararen Ordenantzaren gabeziak agertu dira orain. A, B eta C mailetan euskara ez da derrigorrezkoa lanpostu guztietan. Euskara meritu moduan puntuatzea ere ez. Desoreka handia dago, beraz, D eta E mailekiko.Atarrabiako Euskararen Ordenantza dagoeneko ez da eremu mistoko onena.Helegiteak irabazita, Atarrabiako Udalak lanpostu horietan euskara eskatu behar ez izatea lortu du. Denbora luzean euskaltzaleok liluratuta eduki gaitu, eremu mistoko ordenantzarik onena zela sinetsita. Zorionak Atarrabiako Udalari, ez da hori meritu makala!