Aldatzen ez den gauza bakarra aldaketa bera da, eta gaur egun aldaketak oso bizkor gertatzen dira, teknologiari esker edo teknologiaren erruz! Jakina, gizartea ere aldatzen da baina beste era batean; izan ere, azken hamarkadetan teknologiaren abiadurarekin zorabiatuta dago, oreka guztiz galduta. Azkenean, gure gizartea erabat digital bilakatu da. Alde batetik, horrek abantaila handiak dakartza. Baina, bestaldetik, sortzen duen menpekotasuna geure gizartearen epidemia handiena eta arriskutsuena dela dirudi.
Hasteko, guztiz harrapatuta gaude sare sozialetan ikusten dugunaren eta gure errealitatearen artean, batez ere gazteak. Heldutasun faltagatik ezin dute bereizi ere egin zer den errealitatea eta zer den asmakizuna. Algoritmoek ematen dieten guztia xurgatzen dute, inongo filtro barik. Hortik dator buloen eragina. Interneten ikusten dutena egiatzat hartzen dute pentsatu gabe. Hori dela eta, politikan sare sozialen erabilera oso garrantzitsua da. Zerbaitegatik, orain dela egun batzuk, Trumpek adierazi zuen Tiktok jada bere herrialdearen kontrolpean dagoela. Ezin dugu ahaztu Trumpek berak onetsi zuela Tiktokek lagundu ziola hauteskundeak irabazten. Alegia, bistan dago sare sozialak politikan erabiltzen dituzten tresna eraginkor bihurtu direla.
Hori dena posible izan da denon arreta minimoa gero eta motzagoa delako, beraz, ez gara paragrafo bateko testu bat ere irakurtzeko gai. Izan ere, sare sozialetan etengabeko irudi eta bideoak ikusten ditugunez, kontzentratzeko eta pentsatzeko gaitasuna galtzen ari gara. Tamalez, pentsamendu kritikoa desagertzen ari da, eta horrek esan nahi du gure espeziearen amaiera hasi dela. Ez hori bakarrik, mundu guztiarekin momentu guztietan konektatuta egon arren, gero eta bakardade handiagoa sentitzen dugu. Gainera, Interneten bitartez egindako abusu psikologikoek eta egiten ditugun konparaketek gure buru osasunari eragiten diote.
Hori guztia gutxi balitz bezala, azken boladan, adimen artifizialen garapenarekin harrituta eta zirraratuta gaude. Eskolako lanak eta laneko txostenak AAren laguntzarekin egiten dira. Batzuek ez dute gogoratzen nola bizi ziren AA agertu baino lehen. Oraingo honetan, batzuk konbentzituta daude jada ez dagoela pentsatu beharrik, zeren AAk guk baino hobeto pentsatzen baitu. Hala ere, informazio gehiegi daukagun garai honetan, pentsamendu kritikoa sekula baino beharrezkoagoa da. Bestela, asmatu dugun tresnaren tresna baino ez gara.
