Desfase mundiala 2030

Sei herrialdetan jokatuko da 2030eko Munduko Futbol Txapelketa. Espainian, Portugalen eta Marokon jokatuko dituzte partida gehienak, baina inaugurazio partidak Uruguain, Paraguain eta Argentinan izango dira. Inoiz baino talde gehiagok parte hartuko dute, inoiz baino partida gehiago jokatuko dira, eta inoiz jokatu den Munduko Txapelketarik luzeena izango da, berrogei lehiaketa egun inguru. Dirudienez, orain arte egindako ezein munduko txapelketak ez du etekin ekonomikorik eragin. Horrela ere, kirol ikuskizunen dimentsio guztiak hausteko asmoa du 2030eko Munduko Futbol Txapelketak. Bitartean, gero eta agerikoagoak dira klima aldaketaren ondorioak eta etengabeko hazkunderik behar ez duen eredu ekonomiko berri baterantz biratzeko beharra, etengabeko hazkundearen mitoari bizkarra eman eta mugen zentzua berriro zehaztu behar duena.

Inori bateragarri egiten zaizkio 2030ean egingo den Munduko Futbol Txapelketa erraldoi hori eta klima aldaketaren ondorioak eteteko estrategiak? 2030ean lehen Munduko Futbol Txapelketaren mendeurrena ospatuko da: Uruguai, 1930. Ez al zen nahikoa mendeurrena ospatzea? Erakundeek gizarteari helarazten dizkioten mezuak ez dira soilik kanpaina instituzionalen bitartez zabaltzen direnak: egunero sustatzen dituzten politika eta egitasmoetan islatzen dira, baita gizartearen ongizatea neurtzeko erabiltzen diren indizeen nolakoan ere (BPGak, adibidez, naturaren arpilatzea zehar-kaltetzat duten jarduerak biltzen ditu, hots, ez du aurreikusten etorkizuneko ondorio kaltegarri, eskasiarik). Administrazioari dagokio etorkizunerako norabidean aurrekoen arteko izatea, abangoardian, eta ez iraganeko beharko duten paradigmak sustatzea.