Joan den ekainaren 3an, asteazkenez, hainbat gazte atxilotu zituzten Iruñerrian, eskuin muturreko asaldatzaile den Vito Quilesen ekitaldia egitea eragotzi ondoren gertatutako istiluen harira.
Atxiloketa horietako batean Espainiako Poliziako agenteak ikastetxeko instalazioetara sartu ziren zuzendaritzari aldez aurretik baimenik eskatu gabe, eta eskola-ordutegian adingabea den gure ikasle bat atxilotu zuten. Nekazaritza eta Basogintzako Ikastetxe Integratuko Ekoizpen Agroekologikoko zikloko irakasle garen aldetik, bereziki larritzat jotzen ditugun gertakari hauen aurrean gure kezka eta gaitzespena publikoki adierazi nahi ditugu.
Jarduketa hori azalpenik eman gabe gauzatu zen, ez ikasleari berari, ez une hartan harekin zeuden irakasleei ere. Gainera, agenteek aurpegia estalita zeramaten, eta gaztea eskuburdinak jarrita atera zuten ikastetxetik.
Polizia-ikerketaren inguruko gorabeherak alde batera utzita, uste dugu hezkuntza-esparru baten barruan eta adingabe baten aurka egindako esku-hartze batek gardentasun handiena eta inplikatutako pertsona guztien eskubideen errespetu zorrotza eskatzen dituela. Horregatik, familiak zein hezkuntza-komunitateak gertatutakoaren eta erabilitako prozeduren inguruko azalpen argia merezi dutela iruditzen zaigu.
Hezkuntza-zentroek espazio seguruak izan behar dute, non ikasleek eta irakasleek beren jarduera konfiantzaz eta errespetuz garatu ahal izango duten.
Era berean, gure elkartasuna eta babesa helarazi nahi dizkiogu ikasleari eta haren familiari.
