Zerbait ez dator bat

Egunotan hedabide honetan argitaratutako albisteak hala dio: «Jaurlaritzaren helburua da 2030erako potentzia eolikoa bost bider handitzea. Egun 153 megawatt daude instalatuta, eta 783 megawatt edukitzea da asmoa. 2030ean, bukaerako energiaren kontsumoaren %21 iturri berriztagarrietatik heltzea nahi du Jaurlaritzak; eta 2050erako, %40».

Albiste horren arabera, instalatutako potentzia eolikoa 783 megawattera iritsiko balitz, kasurik onenean (3.350 ordu urtean), lortutako energiak EAErako behar den guztizkoaren %3,9 baino ez luke beteko.

783 megawatt x 3.350 ordu/urte = 2.623.050 megawatt-ordu = 225,58 Ktep.

2008an, EAEko energia osoa 5.756 Ktep izan zen. 2000 eta 2020 arteko energia-kontsumo handiena (Eustat).

783 megawatteko potentzia eolikoa instalatuta edukita, ez dirudi energia-kontsumoaren %21era, are % 40ra, iristeko adina sortuko denik. Zerbait ez dator bat.

Haize-erroten bidez EAEn behar den energiaren %3,9 soilik lortzea espero bada, nola sortuko da gainerakoa, %40raino? Eguzki-energiatik? Ez dirudi gaiaz argi eta garbi hitz egiten ari zaigunik. Badirudi bestelako interesak daudela jokoan, eta ingurua hondatzeak ez duela garrantzirik. Nola aldatzen ari diren gauzak, kamarada.