Julen Aginagaldek debuta egin du gaur Tokioko Olinpiar Jokoetan, Espainiako eskubaloi selekzioak Frantziakoaren aurka 36-31 galdutako partidan. Ligaxkako laugarren jardunaldian izan da. Gaurko partida galduta ere, Espainia final-laurdenetarako sailkatuta dago; Frantzia A multzoko liderra ere bai. Ligaxkako azken lehia igandean jokatuko du, Espainiak Argentina kontrario duela (07:15ean Euskal Herrian). Aginagaldek hiru gol sartu ditu gaurkoan, eta Eduardo Gurbindo eskuin alboko nafarrak, bi.
Viran Morros Espainiako selekzioko jokalariak joko guztiak galduko ditu; izan ere, herenegun, Brasilen aurkako partidan, min hartu zuen. Hortaz, defentsako lanean Aginagaldek hartu du, gaur, haren lekua, blokearen erdigunean.
Frantzia nagusi izan da ia-ia hasieratik, eta atsedenaldian 18-12 zen emaitza. Bigarren zatian alde horri eutsi ahal izan dio Frantziak, sufritu gabe. Nedim Remili Frantziakoa izan da partidako golegile nagusia, bederatzi gol sartuta.
