Alavesek ezin izan du irabazi Vigon. Quique Sanchez Floresen taldea serio aritu da, baina ez ditu baliatu izan dituen gol aukerak, eta Celtak etekina atera dio horri haizea alde izan duenean. Jutgla eta Javi Rodriguez izan dira etxeko taldeko golegileak, eta Novoa kanpoko taldekoa.
Lehen zatia astuna izan da, geldoa. Celtak izan du gol aukera bat edo beste, baita Alavesek ere pare bat: Toni Martinezek bat, eta are hobeago bat Boyek, baina ez batak ez besteak ez dute asmatu.
Bigarren zatia hasi eta gutxira sartu du gola Jutglak, Javi Hernandezen pase eder bat penalti puntutik errematatuta. Golari esker, etxeko taldeak gora egin du, eta abagune mordoxka izan, baina ez da fin ibili, harik eta berriro Hernandez agertu den arte. Atzelariak gol bikaina sartu du 71. minutuan.
Alaves apalago aritu da tarte batez, baina Novoaren golak piztu egin du taldea, eta azken minutuetan gertu izan du berdinketa. Azkenean, ezin.
