Kalkulagailua eskuan jokatu dute Osasunak eta Alavesek Espainiako Ligako azken aurreko jardunaldia, eta txanponaren alde banatan geratu dira bi taldeak. Partida kaskarra jokatu ondotik, gorritxoek 1-2 galdu dute etxean Espanyolen aurka, eta amildegiaren ertzean dira orain. Real Madrili irabazi ziotenean orain dela hilabete, bazirudien mailari eusteko arazorik ez zuela izango Alessio Lisciren taldeak, baina azken lau partidak jarraian galdu ondotik, egoera korapilatu zaie nafarrei. Getaferen zelaian aritu beharko dute azken jardunaldian, eta oraindik ez dute bermatuta mailari eustea. Alavesek, berriz, beste denboraldi batez gutxienez jarraituko du Lehen Mailan. Gasteiztarrek lana gogotik egin dute Oviedori 0-1 irabazteko, eta Toni Martinezen golak sekulako poza eta lasaitasuna eman dizkie gasteiztarrei. Hortaz, azken jardunaldira etxeko lanak eginda iritsiko dira arabarrak.
Osasunak eta Espanyolek aski zuten puntu bana lortzea mailari eusteko, baina bi taldeak irabaztera zelairatu dira hasieratik. Hemezortzi jardunaldiz irabazi gabe egon ondoren, pasa den astean itzuli ziren onbidera kataluniarrak, eta konfiantzaz atera dira lehen minutuetan. Hori bai, Osasunak ere nortasunez ekin dio partidari, eta lehen minutuak intentsitate handikoak izan dira. Partidaren pisua etxeko taldeak eraman du, eta Victor Muñoz izan da gorritxorik onena. Lesio batetik atera berria izan arren, aginte makila hartu du, eta buruhausteak eragin dizkio Espanyolen defentsari.
Erasokor zelairatu da Osasuna, baina Espanyol izan da gola egin duen lehen taldea. Falta bat jaurti du areaz kanpotik, eta aldaratzean Carlos Romerok egin du 0-1ekoa, 26. minutuan. Hasteko, alferrikako falta egin du Budimirrek arearen ertzean; hori gutxi ez, eta defentsako lanean oso bigun jardun dute etxekoek. Inor ez da joan Carlos Romeroren balizko jaurtiketa gelditzera, eta oparia garesti ordaindu du Lisciren taldeak. Bisitarien golak urduritasuna ekarri du Sadarrera, eta ur korrontearen kontra arraun egin ezinik ibili dira gorritxoak.
Dena den, minutuek aurrera egin ahala goranzko bidea hartu du Osasunak, eta Ruben Garciak gertu izan du banakoa. Baloiak Dmitrovic atezaina gainditu du, baina Carlos Romerok berak atepetik urrundu du baloia. Atsedenaldira bitarte neurketa berdintzen ahalegindu dira nafarrak, baina ez dute lortu. Espanyol partidari erritmoa mozten ahalegindu da, eta antsietatea eta egonezina gainditu ezinik ibili dira gorritxoak. Aldageletarako bidean txistu hots batzuk ere entzun dira Sadarreko harmailetatik.
Bigarren zatiari begira bestelako jarrera eta argitasuna plazaratu ditu Lisciren taldeak. Azkar jaso du saria. Izan ere, 49. minutuan banakoa egin du etxekoen jokalari onenak: Victor Muñozek. Korner baten bitartez heldu da berdinketa. Boyomok ongi orraztu du baloia, eta erdilariak ez du barkatu. Golak konfiantza eman die etxekoei, baina gutxien uste zenean 1-2koa egin du Espanyolek. Kike Garcia Osasunako jokalari ohia izan da golegilea. Etsigarria izan da Lisciren jokalariek defentsan erakutsi duten jarrera, erraztasun handiak eman baitituzte.
Hortik aurrera binakoa egiteko bihotza erakutsi du Osasunak, baina bururik eta jokorik ez. Budimirrek pare bat aukera on izan ditu, baina ez du asmatu. Azken jardunaldietan bere mailatik oso urrun ari da aurrelaria. Espanyolek ederki asmatu du etxekoen urduritasunari etekina ateratzen, eta Osasuna arimarik gabeko taldea bilakatu da. Etsia nagusitu da Sadarren, eta orain azken jardunaldira arteko itxaron beharko dute gorritxoek mailari eusteko. Getaferen zelaian jokatuko dute, eta puntu bat lortzea aski izango lukete. Galduko balute, beste emaitza batzuen zain egotea tokatuko litzateke. Bi aurkari zuzenek elkarren kontra jokatuko dute: Gironak eta Elxek. Levantek, berriz, Betisi egingo dio bisita. 42 puntu ditu sailkapenean Lisciren taldeak, ez da kopuru hain txikia, baina oraindik ez daukate ezer bermatuta nafarrek.
Alavesen lan bikaina
Azken jardunaldian lasaitasun osoz arituko dena Alaves izango da, matematikoki lortu baitu mailari eustea. Ondo merezita lortu ditu hiru puntuak. Besteak beste, garaipen bikaina eskuratu du Quique Sanchez Floresen taldeak, Oviedoren zelaian: 0 eta 1. Maila galduta egon arren, lehiakor aritu da Oviedo, baina ez dute hutsik egin gasteiztarrek. Toni Martinezen golari etekina atera diete, eta defentsako jardunean talde lana oinarri hartu eta hortzak gogotik estutu ondotik, urrezko hiru puntu eskuratu dituzte. Azken partidan Rayo Vallecanoren aurka ariko dira arabarrak Mendizorrotzan, eta partida jai giroan bihurtuko da.
Garaipena lortzea ez zaio erraza egin Alavesi. Lehen minutuak lehiatuak izan dira, eta Oviedok hasieratik erakutsi du ez dela denbora pasa zelairatu. Mailari eusteko aukerarik izan ez arren, bere zaleen aurrean garaipena eskuratu nahi izan du, eta jokalariek ere beraien burua aldarrikatzeko baliatu dute partida. Alaves burutsu zelairatu da, patxadaz eta urduritasuna ongi kudeatuz. Oviedo bitan gerturatu da Alavesen area ingurura lehen hamar minutuetan, baina gasteiztarrak gehiago izan dira jokoan. Bada, 17. minutuan iritsi da partidako gol bakarra. Ezker hegaletik jokaldia osatu ondoren, Nicolas Fonsecak arean jarri du baloia, eta Toni Martinezek ez du barkatu. Denboraldiko hamahirugarren gola sartu du.
Golak sekulako mesedea egin dio Sanchez Floresen taldeari, eta lehen zati osoan kontrolpean izan du partida. Cazorla, Hassan eta Alberto Reinak arrisku jokaldiak osatu dituzte Oviedorentzako, baina Sivera atezainak ez du mehatxu nabarmenik jaso. Sendotasuna izan du ardatz Gasteizko taldeak. Bi lerro ongi kokatu ditu zelaian, jokalari guztiek lehentasuna izan dute elkarren ondoan jardutea eta zorrotz lehiatzea, eta etxeko taldeak ez du erasoan ezer sortzeko gaitasunik izan.
Bigarren zatirako aldaketa bat egin du entrenatzaileak, Aitor Mañas zelairatu baitu Diabateren ordez. Aldaketak erakutsi du emaitzari eustea nahi zuela Alavesek nola edo hala. Hasierako minutuetan ez da aparteko ezer gertatu, baina 65. minututik aurrea oso itsusi jarri da partida arabarrentzat. Oviedo sutsu aritu da erasoan, amore eman gabe, eta izerdia ederki bota behar izan du Sivera atezainak. Lana gogotik egin du, baina azkenean 0-1ekoari eutsi dio Alavesek. Partida amaieran zoramena nagusitu da, eta negar malko batzuk ere isuri dira jokalari batzuen begietatik. Gasteiztik Oviedora joandako zaleen emozioa ikusgarria izan da, eta, gutxienez, beste denboraldi batez onenen artean jarraituko du Alavesek.
