Estropada birrindu du gaur ere Arraun Lagunak-ek. Gaurkoa irabazita, Lugañene ontziko arraunlariek beren egin dituzte Galizian jokatutako bi estropadetako banderak. Atzo aise irabazi zuen Redondelan jokatutakoa, eta gaur Bueun ez da aparteko sorpresarik izan. Donostiarrek orain arte jokatutako estropada guztiak irabazi ditu: zazpi. Bueuko estropada eremuan inoiz egin den denbora onena ere egin dute.
Ligako nagusiaren azpitik geratu direnek baina, izan dute lehia. Tolosaldea eta Astillero pare-parean aritu dira uneoro, baina apur bat indartsuago aritu dira gipuzkoarrak. Tarte horretan muturra sartu du Hibaikak. Hirugarren egin dute gaur errenteriarrek, Tolosaldea baino lau segundo gehiago behar izan dituzte eta.
Sailkapen nagusiari begira, Hibaikak gaur puntu garrantzitsuak eskuratu ditu. Hibaikak segundoak janez egin du joaneko bidea, eta nabarmen gailendu da. Ondoren heldu da Astillero. Sanjuandarrei kosta egin zaie gaurko estropada: hasieratik geratu dira atzean, eta, ahalegindu badira ere, ez dute lortu Astillerokoak harrapatzea. Bosgarren izan dira, eta haien atzetik geratu da Orio.
Zumaiarrak eta Donostiarra pare parean izan dira estropada guztian zehar. Saregileak traineruko arraunlariek apur bat gogorrago eman diote, eta ehunenekotan egon da diferentzia: hogei ehunenekotan. Sailkapenak garrantzia zuen bi taldeentzat, puntu dantza handia baitago sailkapen nagusiaren beheko aldean, eta zazpigarren geratzeak zortzigarren geratzea baino puntu bete gehiago ematen baitu.
Azkenekoz 2024an aritu ziren Bueun, eta orduan ere Arraun Lagunak izan zen nagusi.
