Prest daude Lehen Mailako Lau eta Erdiko Txapelketako finalerdiak: Joseba Ezkurdiak eta Javier Zabalak jokatuko dute lehena, datorren larunbatean, Gasteizen; egun bat geroago, berriz, Jokin Altuna eta Peio Etxeberria ariko dira bigarrenean, Donostian.
Finalerdietan gertatzen dena gertatzen dela, Aspe enpresako pilotari batek irabaziko du txapela, enpresa horretakoak baitira finalerdietan ariko diren lau pilotariak. Ez da hori gertatzen den lehen aldia. Duela hiru urte ere Aspeko lau aritu ziren. Orduko hartako hiru pilotarik jokatuko dute oraingoan: Ezkurdiak, Altuna III.ak eta Peio Etxeberriak. Aitor Elordi aritu zen beste hiru enpresakide horiekin batera. Zabalak hartuko du haren tokia. Zabala lehen aldiz iritsi da maila nagusiko lau eta erdikoaren finalerdietara. Bigarren ahaleginean lortu du hori. Iaz lehen aldiz aritu zen, baina Elordik kanporatu zuen final-zortzirenetan.
Altuna III.a, Ezkurdia eta Peio Etxeberria, ordea, ohituta daude azken txanpan aritzera. Altuna III.a 11. aldiz ari da Lau Eta Erdiko Txapelketan, eta lehen aldian ez beste, beti iritsi da finalerdietara; hamargarrenez ari da orain. Aurreko bederatzietatik zortzitan jokatu du finala, eta lautan irabazi txapela.
Ezkurdia, berriz, hamahirugarrenez ari da, eta seigarrenez iritsi da finalerdietara. Aurreko bost aldietatik hirutan jokatu zuen finala, baita irabazi ere, hiruretan Altuna III.ari. Azken bi urteetan ez zen finalerdietarako sailkatu.
Peio Etxeberriak, azkenik, zazpigarren parte hartzea du, eta bosgarrenez ariko da finalerdietan, bosgarrenez jarraian. Iaz finala jokatu zuen, baina galdu egin zuen Unai Lasoren aurka.
