Athletic itzuli da bide onera. Edin Terzicen taldeak lau norgehiagoka zeramatzan irabazi gabe, eta gaur kolpe batez uxatu ditu mamu guztiak: partida biribila egin, eta 4-0 irabazi dio Getaferi San Mamesen.
Partida hasieratik, baloiaren jabe egin da Athletic. Getafek atzean itxaron die zuri-gorriei, eta kontraerasoak baliatzen ahalegindu da. Madrilgo taldeak lortu du lehen minutuetan arriskuarekin heltzea Unai Simonen area ingurura, baina gol aukera argirik sortu gabe. Erosoago zegoen Athletic, eta 17. minutuan heldu da lehen gola, falta batean: Berenguerrek erdiraketa zitala egin du hegaletik, eta, inork ikutu gabe, sarean amaitu du baloiak.
Golari esker hazi egin da Athletic, eta erabat itzali da aurretik ere oso bizkor ez zebilen Getafe. Iñaki Williamsek pare bat jaurtiketa eginak zituen 35. minuturako, eta, azkenean, kontraeraso batean, asmatu du. Gerenabarrenak berreskuratu du baloia zelai erdian, Berenguerrek Iñakiri eman dio pasea, eta Williams anaietan zaharrenak ederki amaitu du jokaldia.
Bigarren zatian baloi gehiago izan du Getafek, baina Athletic oso sendo aritu da defentsan. Errenta handitzeko bi golak geldikako jokaldietan egin dituzte zuri-gorriek: hirugarrena 69. minutuan sartu du Paredesek korner bat buruz errematatuta, eta laugarrena Yurik, 87.ean, area kanpotik sekulako ezkerkada jota. Era batera edo bestera, lau goletan hartu du parte Berenguerrek.
Emaitza alde izanda, Terzicek Christian Imga eta Txus Bizkai harrobiko jokalariak zelairatu ditu estreinako aldiz lehen taldearekin. Athletic zortzigarren da sailkapen nagusian, 12 punturekin.
