Alerta laranja dago gaur Valentzian, euria dela eta. Hala, azkenerako bertan behera geratu da Athleticek Levanteren zelaian jokatu behar zuen partida. Egun osoan zehar egon da zalantza partida jokatuko ote zen. Alejandro Quintero epaileak azken unera arte itxaron du erabakia hartzeko. Partida 21:30ean zen jokatzekoa, baina 20:50 inguruan euri jasa handi bat izan da. Hala, Levanteren zelaia urez gainezka zegoenez, neurketa ez da jokatuko. Bi taldeek beste data bat adostu beharko dute norgehiagoka jokatzeko.
Talde zuri-gorriak larunbatean jokatuko du hurrengo neurketa, Alavesen aurka, San Mamesen. Ondoren etena izango da, selekzioen arteko partidak direla-eta. Valentziara bidaiatu duten Athleticeko jokalariek, entrenatzaile multzoak eta zuzendaritzako kideek Valentzian igaroko dute gaua.
