Gorabeheratsuak izan dira azken egunak Osasunan, Braulio Vazquez kirol zuzendariak Valentziara joatea erabaki ostean. Ezustea bulegoetan, eta iraultza zelaian. Horixe Luis Miguel Ramisek gaur Atletico Madrilen aurka hasierako hamaikakoan egin duena, larunbatean Espanyolen aurka ateratakoarekin alderatuz zortzi aldaketa egin baititu. Apustua, ordea, ez zaio ondo atera, 4-0 galdu baitu. Egia da 1-0ekoarekin epaileak erabaki eztabaidagarri bat hartu duela: baliorik gabe utzi du balekoa zirudien Argibideren gol bat. Baina bigarren zatiaren lehen erdian etxekoek beste bi aldiz zulatu dute gorritxoen atea, eta erabakita utzi dute partida. Eta neurketa amaitzeko 10 minutu falta zirela biribildu dute neurketa, laugarrena sartuz. Azken hiru partidetan 11 gol jaso ditu Osasunak, eta gaurkoan ere arazo asko izan zituen defentsan. Bigun jardun dute beste behin, eta akatsak egin dituzte zaintzetan. Gainera, Atletico Madrileko erdilariek eta aurrelariek min handia egin diote lerro artean.
Ramisek hasierako hamaikakoan egin dituen aldaketen artean esanguratsuena atekoa izan da: Aitor Fernandezek jokatu du, Sergio Herreraren ordez. Bestalde, lehen taldearekin debuta egin du Unai Santos harrobiko jokalariak. Argibide izan zen gorenean debuta egin zuen Taxoareko azken jokalaria, 2024ko otsailean. Aulkian geratu dira Ruben Garcia, Iker Muñoz, Moncayola eta Budimir, besteak beste.
Osasuna atzean kokatu da hasieratik, eta Atletico Madrilen esku utzi du jokoaren ekimena eta baloiaren jabetza. Ez zuen nahi lehen minutuetan gol bat jasotzerik. Baina etxekoek bi aukera on izan dituzte aurretik jartzeko. Baina aurrenekoan Lookmanek kanpora bidali du baloia buruz; bigarrenean, berriz, Kang-in Leek erremate ona egin du, baina Aitor Fernandezek ondo atera du eskua baloia aldentzeko.
Baina bi abagune horiek baino argiagoa izan da Raul Garcia de Harok izan duena, Osasunari abantaila emateko. Morok pase bikaina eman dio, eta aurrelaria buruz buru geratu da Oblaken aurrean. Atezainak, ordea, gelditu bikaina egin dio. Osasunak atzean sartuta jarraitu du. Etxekoek zelai erditik gora asko mugitzen diren jokalariak dituzte, eta horrek zaildu egiten du haien zaintza. Hala, 24. minutuan Kokek pase ona eman dio sakonean Grimaldori. Hegalekoa ia ondoko marrara iritsi zen; atzera eman du pasea, eta Jonathan Davidek errematatu du. Aurreneko ahaleginean Aitor Fernandezek gelditu bikaina egin dio, baina aldaratzea aurrelariari iritsi zaio, eta oraingoan sareetara bidali du baloia.
Osasunak ahalegina egin behar zuen atsedenaldia baino lehen berdinketa lortzeko, eta lortu du. Argibidek zulatu du Oblaken atea. Baina epaileak baliorik gabe utzi du gola. Torrok buruz jo du baloia Argibideren errematea baino lehen, eta epaileak adierazi du jokaldi horretan erdilariak Le Normandi falta egin diola. Oso eztabaidagarria izan da erabakia. 30. minutua zen.
Osasunak aurrerapauso bat eman du defentsan lehen zatiaren azken txanpan. Ez da hain atzean kokatu, eta baloiarekin hobeto aritu da. Arriskua hartu beharra zuen. Baina aldi berean horrek aukera eman dio Atletico Madrili kontraerasoan min egiteko. Hala, hiruzpalau aukera on izan ditu aldea areagotzeko, argiena, 42. minutuan. Baina Aitor Fernandez agertu da berriro ere. Bi gelditu erabakigarri egin ditu; bat Kang-in Leeri eta beste Jonathan Davidi.
Maldan gora
Bigarren zati hasieran adi egon beharra zuen Osasunak, beste gol bat ez jaso eta partidan sartuta segitzeko. Baina ez du lortu. 10 minutuko tartean bi sartu ditu etxeko taldeak: 53. minutuan, Kang-in Leek, erremate gurutzatu batekin, eta, 64.ean Le Normandek korner batean. Gorritxoak berriro ere bigun aritu dira defentsan, batez ere bigarren golaren jokaldian.
3-0ekoarekin maldan gora jarri zaio neurketa Osasunari. Etxekoak nagusi ziren, partida kontrolpean izan dute, eta kontraerasoan laugarrena sartzen saiatu dira. Hasiera batean ez dute lortu; besteak beste, Aitor Fernandezen lan onari esker. Lau gol jaso arren, hura izan zen partidako jokalaririk onena Osasunan. Azkenerako, ordea, Baenak etxekoen laugarrena sartu du, Cardosorekin lotutako jokaldi on baten ostean. Sufrikarioa izan dira azken minutuak gorritxoentzat.
Hirugarren partida galdu dute segidan gorritxoek, baina burua jaso, eta larunbatean Rayoren bisita izango dute Sadarren. Irabazi beharreko partida, sasoiko lehen etenera are zalantza handiagoekin ez joateko.
Atletico Madril-Osasuna
Atletico Madrid: Oblak; Llorente, Cuti Romero (Arnau Ortiz, 67. min.), Le Normand, Grimaldo (Hancko, 82. min.); Cardoso (Hjulmnad,82. min), Koke; Kang-In Lee, Baena, Lookman (Pubill , 67. min.); Jonathan David (Simeone, 67. min.)
Osasuna: Aitor Fernandez; Argibide (Moncayola, 70. min.), Yeboah, Boyomo, Unai Santos, Abel Bretones; Dubasin (Kike Barja,59. min.), Lucas Torro, Osambela (Del Castillo, 74. min.), Raul Moro (Ruben Garcia, 59. min.); Raul García de Haro (Budimir, 59. min.).
Golak: 1-0: Jonathan Davidek (24. min). 2-0: Kang-In Leek (53. min.). 3-0: Le Normandek (64. min.). 4.0: Baenak (82. min.).
