Bera Berak urrats handia egin du Europako Ligako ligaxkara sailkatzeko. Gaur hasi du hirugarren kanporaketa Espainiako Ro'Casaren etxean, eta hiru golen aldea lortu du jada, 27-30 irabazi baitu. Partida oso estua izan da, baina bigarren zatiaren amaieran aurretik jarri dira donostiarrak, eta, azkenean, tarte ona lortu dute.
Itzuliko partida datorren asteko igandean izango da, Donostian, 18:00etan, eta aukera handiak ditu taldeak Europako Ligako ligaxka jokatzeko. Hala ere, partida ona jokatu beharko du Bera Berak estualdirik ez pasatzeko.
Oso berdindua izan da partida; are, atsedenaldira 15-15 berdinduta iritsi baitira. Bigarren zatiaren gehiengoa ere estua izan da, baina azken minutuetan lortu du Bera Berak gol gehiago sartzea.
