PIRAGUISMOA. Atzo hasi zen Munduko Txapelketa La Seu D'Urgellen (Herrialde Katalanak), eta Euskal Herriko piraguistek oso emaitza onak lortu zituzten: urrezko bi domina eta zilarrezko beste bi eskuratu zituzten taldekako probetan.
K1 mailan, Joan Crespo eta Samuel Hernanz garaile izan ziren, David Llorenterekin batera. Klara Olazabalek, berriz, zilarrezko domina lortu zuen C1 mailan, taldekide bezala Nuria Vilarubia eta Ainhoa Lameiro zituela. Australiarentzat izan zen urrezko domina. Maila horretan bertan, Ander Elosegi ere bigarren izan zen, Luis Fernandez eta Miquel Traverekin batera. Eslovakia gailendu zen. Maialen Chourraut, ordea, laugarren izan zen.
Taldekako probak jokatuta, gaur hasiko da banakako lehia. Elosegi C1 mailan ariko da, eta Chourraut, K1 mailan. Goizean jokatuko dituzte bi kanporaketak, eta, sailkatuz gero, etzi ariko lirateke finalerdian, baita balizko finalean ere.
Crespok, Hernanzek eta Olazabalek, berriz, bihar ekingo diote bakarko lanari, kanporaketekin. Lehen biak K1 mailan aterako dira, eta Olazabal, C1 mailan. Biharko kanporaketetan aurrera egitea lortuko balute, igandean izango lituzkete finalerdiak eta finala.
Bi urre eta bi zilar lortu dituzte euskal piraguistek
Crespo eta Hernanz munduko txapeldun izan dira taldekako K1ean; Elosegi eta Olazabal bigarren C1ean
Iruzkinak
Ez dago iruzkinik
Ordenatu
