Atzo ezustekoa hartu ostean, gaur espero zena gertatu da Alacanten (Herrialde Katalanak), Bidasoak 30-37 irabazi baitio Huescari, eta bihar Espainiako Kopako finala jokatuko du Irungo taldeak (Gipuzkoa), Bartzelonaren kontra. Oso zaila izango du Kopa irabaztea, talde indartsuagoa baita Bartzelona, baina garrantzitsuena gaur lortu du Bidasoak, finalera iritsita Europako sailkatzea lortu baitu taldeak, ligan lortu ez duena, hain zuzen ere. Are, garaipen handien gisara ospatu dute Bidasoa taldeko jokalariek partida amaitu ostean.
Final-laurdena atzo jokatu zuen Bidasoak, Torrelavegaren kontra; partida zaila zen irundarrentzat, denboraldi hobea egin baitu Kantabriako taldeak, baina ezustekoa eman zuen, 32-26 irabazita. Gaur, berriz, aurkari askoz apalagoa zuen Irungo taldeak, Huesca, bigarren mailara jaitsia, eta oraingoan aurreikuspenak segituan bete dira, lehen minutuetan 0-5 irabazten hasi baita Bidasoa, partida erraza izango zela iradokiz. Tarte erosoa mantenduz joan dira irundarrak, baina lehen zatiaren amaieran Huescak estutu egin du, hiru golera gerturatuz, eta atsedenera bost golen aldearekin iritsi dira, markagailua 13-18 zela amaitu baita lehen ordu erdia.
Tarteari eusten
Atsedenaldiaren ostean, tartea handitzen jarraitu du Bidasoak, eta, gol segida bati esker, zazpi tantoko abantaila lortu dute une batean. Alde handi horrek emozioa kendu dio partidari, eta golak tartekatuz joan dira bi taldeak amaierara arte; azkenean, 30-37 irabazi du Bidasoak.
Bihar, beraz, Espainiako Kopa irabazteko aukera izango du Irungo taldeak, baina ospakizunak gaurko partida amaitu bezain laster hasi dituzte, Europarako sailkatzea lortu baitute. Beraz, bihar dena dute irabazteko, Bartzelonak aukera handiagoa baitu irabazteko, Bidasoa baino gehiago denez gero. Europarako sailkatzeko helburua lortuta, denboraldia biribiltzeko aukera baliatzen saiatuko da, beraz, bihar Bidasoa, Alacanten (17:00, Teledeporte).
