EH Bilduk euskal selekzioaren ofizialtasunaren aldeko aldarrikapenak aintzat hartzeko eskatu dio Pedro Sanchez Espainiako Gobernuko presidenteari, eta hark erantzun dio «dena» ez dagoela haien esku: «Erronka batzuk nazioarteko federazioen borondatearen menpe daude. Ahal duguna egiten dugu. Zorrotz lan egiten jarraituko dugu euskal gizartearen kezkei eta asmoei erantzuteko, betiere indarrean dagoen esparru juridikoaren barruan».
Mertxe Aizpurua EH Bilduko bozeramaileak euskal herritar gehienen nahia errespetatzeko esan dio Sanchezi: «Nazio aniztasuna ezin daiteke sinbolikoa izan, aitortzak benetakoa eta eraginkorra izan behar du». Kirolaren Legea onartuta urrats garrantzitsua egin zela adierazi du, baina azpimarratu du arauak muga asko dituela: «Euskal selekzioak diziplina guztietan eta nazioartean lehiatzea nahi dugu, baldintza berberetan, zuek zuenarekin egiten duzuen bezala. Ez dugu inor baino gehiago eskatzen, ezta gutxiago ere».
Sanchezek erantzun dio Espainiako Gobernua «konprometituta» dagoela euskal gizarteak kirol arloan dituen nahiak entzuteko eta horiei erantzuteko. Kirolaren Legea gogora ekarri, eta euskal pilotaren kasua aipatu du, eta esan espero duela hurrengo urteetan surfean «aurrerapauso garrantzitsuak» ematea.
