Osasunak kirol arloko erabaki garrantzitsua hartu du gaur, eta 2029ra arte berritu die kontratua taldeko kirol zuzendari Braulio Vazquezi eta idazkari tekniko Jose Antonio Prieto Cata-ri. Biei ala biei datorren denboraldiaren bukaeran bukatuko zitzaien lan hitzarmena Osasunarekin, eta beste hiru urterako luzatu dute.
Braulio eta Cata 2017an iritsi ziren talde gorritxora, Valladolid taldetik. Brauliok taldearen kirol ardura nagusia hartu zuen, eta, Cata jarri zuen bere ondoko, idazkari tekniko.
Bederatzi denboraldi daramatzate elkarrekin lanean. Lanean hasi eta bigarren sasoian, Osasuna Espainiako Lehen Mailara igo zen. Ondoren, talde gorritxoak mailari eutsi dio. Behin sailkatu da Espainiako Kopako final baterako, beste behin Konferentzia ligarako, eta beste behin Espainiako Superkoparako.
Braulio eta Cata klubean lanean ari direnetik, taldeak hiru entrenatzaile izan ditu: Diego Martinez, Jagoba Arrasate eta Alessio Lisci.
