Ezustekoa Osasunan: Braulio Vazquezek, azken bederatzi urteetan klubeko kirol zuzendari izan denak, kargua utzi du. Hala jakinarazi dio Vazquezek Osasunari. Valentziak kirol zuzendariaren etete klausula ordainduko du, 290.000 eurokoa, eta klub horretako kirol zuzendari postua hartuko du galiziarrak.
2010 eta 2013 artean ere Valentziako kirol zuzendari izandakoa da Vazquez. Bihar emango ditu azalpenak Sadarren, 13:00ean.
Ohar labur baten bidez eman du berria Osasunak, eta Vazquezen lekukoa nork hartuko duen ere iragarri du: Jose Antonio Prieto Cata izango da Osasunako kirol zuzendari berria. 2017tik, Prieto Osasunako futbol profesionaleko idazkari teknikoa izan da.
Osasunak eskerrak eman dizkio Vazquezi egindako lanagatik eta azken hamarkada arrakastatsuagatik, eta etorkizunerako zorterik onena opatu dio.
Izan ere, Vazquez Osasunara heldu zenean, taldea bigarren mailara jaitsi berria zen. Lehen urtean ez, baina bigarrenean, Jagoba Arrasate entrenatzaile zela, mailaz igotzea lortu zuen Osasunak. Ordutik, Nafarroako taldea lehen maila egonkortu da, eta, besteak beste, Espainiako Kopako final bat jokatu zuen 2022-2023 denboraldian.
