Bigarren etapan egin bezala, Matthew Brennan (Visma) nagusitu da gaur Espainiako Vueltako bosgarren etapan. Ingelesa izan da berriro azkarrena esprintean, eta bikain biribildu du taldeak egindako lana. Etapa aproposa zen esprinta jokatzeko, Falset eta Roquetes arteko ibilbideak ez baitzuen aparteko zailtasunik. Ihesean helmugaratzeko hainbat ahalegin egon dira, tartean Diego Uriarte (Kern Pharma) eta Xabier Mikel Azparrenenak (Q36.5). Baina ustelak izan dira guztiak. Azken zuzengunean erabaki da irabazlea, eta Brennan nagusitu da, alde handiz. Jordi Meeus (Red Bull) sailkatu da bigarren, eta Vincenzo Albanese (Education First) hirugarren.
Sailkapen nagusian ez dago aldaketarik lehen postuetan, eta Tadej Pogacar (UAE) da lider. Esloveniarrak hiru minututik gorako aldea ateratzen die aurkari guztiei: 3.21 Primoz Roglici (Red Bull), 3.32 Enric Masi (Movistar), 3.44 Sepp Kussi (Visma), 3.45 Oscar Onleyri (Ineos), 3.50 Richard Carapazi (Education First), 3.57 Felix Galli (Decathlon) eta 4.06 Mattias Skjelmoseri (Lidl), besteak beste. Ibon Ruiz (Kern Pharma) da lehen euskal herritarra, hamazazpigarren postuan, 8.37ra.
Bihar, saltsa
Bihar, saltsa egotea espero da, oso etapa gorabeheratsua jokatuko baitute Alcossebre eta Castello artean: txirrindulariek 177,5 kilometro egingo dituzte, eta 3.000 metroko desnibelari egingo diote aurre. Lau mendate igoko dituztelako dauka etapak horren desnibel handia: bigarren mailako bat, hirugarren mailako bat, bigarren mailako bat eta lehen mailako bat, hurrenkera horretan. Lehen mailako El Bartolo da gogorrena: 9,4 kilometroko luzera du, eta %7,1eko batez besteko pendiza. Azken mendate horretan, gainera, hiru kilometro inguruko sterrato (lurbide) zati bat dago. Hogei kilometro inguru daude tontorretik helmugara.
