Jonathan Castroviejok iragarri du sasoi amaieran erretiroa hartuko duela, 38 urterekin. Sare sozialetan zabaldutako ohar baten bidez jakinarazi du, Giroko atseden eguna baliatuz. «Nire bizitzako kapitulu hau itxi, eta beste bat hasteko unea iritsi da. Txirrindularitzak dena eman dit. Oso eskertuta nago, eta eskerrak eman nahi dizkiet bide honetan ondoan izan ditudan guztiei».
Bikotekidea, seme-alabak eta gurasoak izan ditu gogoan, batez ere. «Nire zutarriak izan dira eman dudan pedalkada bakoitzean, eta lortu dudan garaipen bakoitzean; baita min hartuta egon naizenean ere».
2008an hasi zen Orbearekin, eta, ondoren, Euskaltelen, Movistarren, Skyn eta Ineosen korritu du. Batez ere erlojupeko probetan nabarmendu da. Europako txapeldun izan zen 2016an, eta hiru asteko itzuli batean liderraren maillota jantzi duen azken euskal ziklista da orain arte ―2014an egun batez, Espainiako Vueltan―. 11 garaipen ditu profesionaletan. Guztira hogei itzuli handi amaitu ditu.
