Garai gozoan da Dario Gomez pilotaria (Ezkarai, Espainia, 1996). Igandean buruz buruko txapelketako finala jokatuko du Iñaki Artolaren aurka, Iruñeko Nafarroa Arena frontoian. Dariok aurreneko finala du maila nagusian. Bada, Asperekin duen kontratua beste hiru urtez —2029 arte— luzatu berritan jokatuko du finala. Hain zuzen, igandean bukatzekoa zitzaion Eibarko enpresarekin zuen lan hitzarmena, hau da, finalaren egunean.
«Oso pozik nago, gehien gustatzen zaidana egiten jarraituko baitut: pilotan jokatu; gainera, kide bikainekin», esan du Dariok, kontratua sinatu berritan.
Pilotari errioxarrak 11 urte daramatza profesionaletan jokatzen, eta txapel bat dut irabazia: 2019an, Bigarren Mailako buruz buruko txapela jantzi zuen, finalean Aitor Elordiri nagusituta. Beste final bat jokatua du: 2016an, Bigarren Mailako lau eta erdikoa galdu zuen Erik Jakaren aurka.
