Ekaitz arrisku handia iragarria dago arratsalderako. Ondorioz, Ehunmiliak lasterketako antolakuntzak proba nagusia bi orduz atzeratzea erabaki du. 18:00etan hasi beharrean, 20:00etan ekingo diote. Ibilbideko kontrol puntuetako denbora mugak aldatuko direla ohartarazi dute antolatzaileek.
Ultra trail lasterketak hamabigarren aldia du gaurkoa. Ohiko denez, Beasaingo (Gipuzkoa) udaletxe plazatik abiatuko da 168 kilometroko lasterketa hori. 11.000 metroko desnibel positiboa du, eta 550 korrikalarik parte hartu ahal dute. Haien segurtasuna bermatzea lehenetsi dute antolatzaileek. Beste bi probak, G2 Handiak eta Marimurumendi, aurretik ezarritako ordutegian hasiko dira.
