Epaileak Patxi Izko inputatu gisa deitu du deklaratzera, hilaren 29rako

Patxi Izko Osasunako presidente izandakoak epailearen aurrean deklaratu beharko du berriz inputatu moduan. Fermin Otamendi Iruñeko Bigarren Instrukzio Epaitegiko epaileak otsailaren 29rako deitu du deklaratzera, argitu dezan zertarako erabili ziren hura lehendakari zela kutxatik atera ziren 3.090.000 euro.

Epailearen arabera, diru hori norbaitek atera zuen kutxatik 2003 eta 2007 artean: 2003an, 2004an eta 2005ean, 1.380.000; 2006an, 1.260.000; eta 2007an, 450.000. Epaileak dio ez dagoela informazio nahikorik diru irteera horiek zertarako erabili ziren frogatzeko. Horregatik deitu du deklaratzera Izko, bera zelako klubeko arduradun nagusia garai horretan.

Atzo kaleratutako oharrean, halaber, epaileak jakinarazi zuen bere esku dagoela Izkoren garaiko kontu ikuskatzea. Epaileak Nafarroako Gobernuko Ekonomia, Ogasuna, Industria eta Lan Sailari bi teknikari aukera zitzan kontu ikuskatzea egin zezaten.

Izkok inputatu gisa deklaratuko du. Fermin Otamendi epaileak Osasunaren auzia-aren barruan inputatutako 29 lagunetako bat da. Beste lehendakari ohi bat ere dago tartean, Miguel Artxanko, baita bi presidente horien garaian klubaren kudeatzaile izandako Angel Bizkai ere. Klubeko ordezkari eta jokalari ohiak daude erebai nahastuta. Diru kontuei lotutako salaketez gain, kirol arlokoak ere badaude. Izan ere, epailearen arabera, frogatuta dago hainbat partidetako emaitza adostu zirela, klubak maila gal ez zezan.