Espainiako selekzioak gaizki ekin zion Munduko Kopari, eta hutsean berdindu zuen Cabo Verderen aurka. Afrikako selekzio hori txapelketak aurrera egin ahala oso lehiakor aritu izanagatik ere, lehen partida horretan oso itxura eskasa eman zuen Espainiak. Hiru aste pasatu dira orduz geroztik, eta, tarte horretan, Espainiak bidea zuzendu du. Pausoz pauso ari da bidea egiten, eta jada final-laurdenetan dago.
Gaur gauean sailkatu da kanporaketa horretarako: 0-1 irabazi dio Portugali Dallasen (AEB), final-zortzirenetan. Hori eginda, hobetu egin du duela lau urte Qatarren jokatutako Munduko Kopan egindako lana: orduko horretan final-zortzirenetan joan zen kalera. Portugalek, aldiz, Qatarren baino bide laburragoa egingo du oraingoan, eta kanporaketa bat lehenago esango du agur.
Bi selekzioetako hautatzaileei, Luis de la Fuente Espainiakoari eta Roberto Martinez Portugalgoari, gustatu egin zitzaien euren jokalariek final-zortzirenetan egin zuten lana, eta zera pentsatu dute: ez da aldatu ondo dabilena. Hala, ia ez dute aldaketarik egin hasierako hamaikakoetan. De la Fuentek azken partidan hasieratik zelairatu zituen 11 jokalarien alde egin du berriro. Martinezek, berriz, aldaketa bakarra egin du: Joao Felix jarri du hasieratik, Rafael Leaoren ordez.
Apustua hobeto atera zaio Espainiari lehen minutuetan. Baloiaren jabe egin da, eta bizi-bizi jokatuta, arriskua sortzen hasi da. Lehen ordu laurdenean hirutan egon da gola sartzekotan, baina ez Oiartzabalek, ez Lamine Yamalek, ez Alex Baenak ez dute asmatu. Oiartzabalek izan du aukerarik garbiena, baina kanpora bidali du baloia Diogo Costa atezain portugaldarraren aurrean bakar-bakarrik zegoela.
Gogotik sufritu du Portugalek neurketa hasieran, baina, pixkanaka-pixkanaka, gai izan da Espainiarekin nor baino nor gehiago aritzeko. Lehen zatiaren azken minutuetan estutu du gehien aurkaria, eta, horri esker, aurreneko gol aukerak izan ditu. 38. minutuan, Unai Simonek geldiketa ona egin dio Cristiano Ronaldori. Askoz argiagoa izan da 41. minutuan Nuno Mendesek izan duen aukera. Area kanpotik jaurti du, eta baloia sareetara zihoala, Pedro Perrok buruz ukitu du, eta baloiak langa jo du.
Aurrenekoz partidan bere burua larri ikusi arren, Espainiak ez du atzera egin, eta bi selekzioek erasora jokatuta bukatu dute lehen zatia. Hala ere, ez batak, ez besteak ez du jaso ahaleginaren saria, eta golik gabe amaitu da lehen zatia.
Aldaketek mesede egin diote Espainiari
Bigarren zatiari ere erasoko ekin diote bi selekzioek. 54. minutuan, albiste txarra jaso du Portugalek, Nuno Mendesek min hartu baitu, eta zelaia utzi. Ezker hegaleko atzelaria oso ondo ari zen: defentsan, bikain ari zitzaion eusten Lamine Yamali; eta, erasoan, arriskua sortzen ari zen. Martinezek Nelson Semedo zelairatu du haren ordez.
Aldaketa horrek apur bat desorekatu du ordu arteko oreka Espainiaren alde, eta, pixkanaka, selekzio hori zelaian gailentzen hasi da. Hori gelditzeko asmoz, 71. minutuan, Portugalgo hautatzaileak Diogo Dalot eta Rafael Leao zelairatu ditu Joao Canceloren eta Joao Felixen ordez. Aldaketak egin eta hurrengo jokaldian, ordea, Lamine Yamalek estu hartu du Diogo Costa falta jaurtiketa batean. Beste horrenbeste egin du Bruno Fernandesek Unai Simonekin handik gutxira, baina haren jaurtiketa kanpoko sarera joan da.
Azken txanpari ahalik eta freskoen ekiteko, De la Fuentek eta Martinezek aldaketa dezente egin dituzte: Espainiako selekzioan, Ferran Torrresek, Fabian Ruizek eta Mikel Merinok Baena, Pedri eta Dani Olmo ordezkatu dituzte, eta, Portugalen, Bernando Silva eta Francisco Conçeiçao Bruno Fernandesen eta Pedro Netoren ordez zelairatu dira. Hain zuzen, zelaira irtendako bi jokalariri esker sartu du gol erabakigarria Espainiak, 91. minutuan: Torresek pase zehatza eman dio Merinori, eta hark ez du huts egin. Gutxi falta zen neurketa bukatzeko, baina Bernando Silva eta Joao Neves berdintzekotan egon dira. Ez dute asmatu, eta hortxe amaitu da neurketa.
