Euskal selekzioak bederatzigarren domina irabazi du Munduko Euskal Pilota Txapelketan: brontzezkoa eskuratu du, frontball-ean. Miren Larrartek Julieta Rengel Venezuelako ordezkaria hartu du mendean brontzezko domina nork irabazi erabakitzeko partidan, Buenos Airesko Club Banco Provincian. Nagusitasunez irabazi dio, bi jokotan: 10-5 eta 10-8. Olatz Arrizabalagak ez du gaur jokatu, baina berea ere bada brontzezko domina.
Hala, euskal selekzioak ziurtatu egin du Munduko Txapelketan hamabi domina eskuratzea. Izan ere, beste hiru irabaziko ditu gaur, hiru final jokatuko baititu txapelketako azken jardunaldian. Gizonezkoen frontball-ean, Mexikoren aurka ariko da, 17:00etan. Julen Alberdik jokatuko du. 36 metroko frontoian, berriz, pilota egokituan Frantziaren aurka ariko da euskal selekzioa, 19:00etan. Ikusteko dago nortzuk jokatuko duten. Pala motzean, berriz, Espainia izango du aurkari, 21:00etan. Esteban Gaubeka eta Imanol Ibañez ariko dira.
Gaur-gaurkoz, euskal selekzioak Espainia bakarrik du aurretik dominen sailkapenean: urrezko sei ditu Espainiak, eta lau euskal selekzioak. Gaur, Espainiak bost final jokatuko ditu, eta euskal selekzioak hiru. Gertatzen dena gertatzen dela, euskal selekzioa bikain aritu da, lehiatu den hamabost modalitateetatik hamabitan irabaziko baitu domina, eta beste batean brontzea nork eskuratzeko neurketa jokatu baitu.
Nazioarteko Federazioaren egoitza, Miarritzen
Bestalde, Nazioarteko Euskal Pilota Federazioak azken orduko aldaketa bat egin du, eta haren egoitza nagusia Miarritzen (Lapurdi) egongo da, eta ez Buenos Airesen, asteazkenean egindako urteko batzar orokorrean onartu zen bezala. Ezusteko bat izan zen batzar orokor horretan. Izan ere, aurretik zuzendaritza batzordeak onartu egin zuen egoitza Iruñetik Miarritzera lekualdatzea, eta batzar nagusian erabaki hori berresteko bozketa egin behar zen. Baina Espainiako Federazioaren abstentzioa tarteko, Buenos Airesen hautagaitza gailendu zitzaion Miarritzekoari, aldeko 43 boto lortuta, Miarritzekoak baino hiru gehiago. Hala ere, Pablo Lambardi Argentinako Pilota Konfederazioko presidente eta Nazioarteko Federazioko idazkari nagusiak gaur esan du «lanean» ari direla egoitza Miarritzen egon dadin. Horrela, egoitzak Euskal Herrian jarraituko du.
