Amaitu da Munduko Euskal Pilota Txapelketa Argentinan eta Uruguain. Euskal selekzioa lehen aldiz lehiatu da ofizialki herrialdeen arteko txapelketa nagusian, eta bikain lehiatu da, onenen pare aritu baita. Bildu duen dominen uzta oparoari erreparatu baino ez dago, hamabi irabazi baititu: urrezkoak lau, zilarrezkoak zazpi eta brontzezkoa bat. Hirugarren izan da sailkapen nagusian: Espainia izan da lehena, euskal selekzioak baino urrezko hiru domina gehiago bilduta, eta, Argentina, bigarren, urrezko domina bat gehiago batuta. Lan ikusgarria egin du euskal selekzioak, kontuan hartuta 22 modalitateetatik hamabostetan lehiatu dela. Arrastoa utzi du lehen aldiz parte hartuta, eta arrastoa utzi du horren ondo arituta.
Euskal selekzioak zortzi domina bilduta ekin dio azkeneko jardunaldiari, eta, gaur, beste lau lortu ditu. Pala motzean zilarrezko domina irabazi du, finalean Espainiaren aurka galduta: 2-1 (9-15, 15-11 eta 10-5). Gizonezkoen frontball-ean eta 36 metroko frontoiko pilota egokituan ere zilarrezkoa lortu du, horietan ere galdu egin baitu finala: frontball-ean, bi jokotan galdu du Mexikoren kontra (10-6 eta 10-3): pilota egokituan, berriz, Frantziaren aurka galdu du, bi jokotan: 15-9 eta 15-9. Azkenik, brontzezko domina emakumezkoen frontball-ean eskuratu du, irabazi egin baitio Venezuelari brontzezko domina nork irabazi erabakitzeko partidan, bi jokotan: 10-5 eta 10-8.
Euskal selekzioak egindako txapelketa bikainak amaiera bikaina merezi zuen, eta hori egitear egon da, baina Esteban Gaubekak eta Imanol Ibañezek galdu egin dute azken finala, pala motzekoa. Lehen jokoan nagusi izan dira. Bigarrenean, ordea, behera egin dute, eta aurkariek gora. Horri esker, jokoa irabazi dute. Ordurako Carlos Bouza espainiarrak min hartua zuen, eta Emiliano Skufcak ordezkatu. Atzelari jarri da Skufca, eta Javier Insausti atzelari nafarra, aurrelari. Horrela ekin diote joko erabakigarriari. Tentsioak gainezka egin dio, eta egoera horretan hobeto aritu da Espainiako bikotea. Gaubeka eta Imanolena ez ezik, Jagoba Madariagarena eta Iker Gordonena ere bada zilarrezko domina.
Julen Alberdik jokatu du eguneko lehen finala, frontball-ean, Abraham Moctezuma Niño mexikarraren aurka. Alberdik bazekien oso neurketa zaila zuela, Mexikokoak baitira onenak frontball-ean. Gaur ez du jokatu David Alvarez Stich beteranoak, Moctezuma gazteak baizik. Baina hura ere espezialista bikaina da, eta horren berri eman du. Saiatu, gogotik saiatu da Alberdi, baina ez du lortu Moctezumaren sendotasunari pitzaduraren bat egiten. Galdu arren, lan ederra egin du. Mikel Aurrekoetxeak ere jokatu du, eta harena ere bada zilarrezko domina. Santi Yaniz nafarrak brontzezkoa lortu du Espainiarekin.
Haren aurretik, Miren Larrartek brontzezko domina irabazi du, Julieta Rengel venezuelarrari nagusituta. Olatz Arrizabalagak ere jokatu du txapelketan; beraz, harena ere bada domina. Euskal selekzioak oso lan ona egin du frontball-ean. Espainiako ordezkari Laia Salsamendi nafarrak finala jokatu du, eta galdu egin du Mexikoren aurka. Goiuri Zabaleta nafarra ere aritu da Espainiarekin txapelketan.
Pilota egokituan, euskal selekzioak ezin izan du trinketan egin bezala Frantzia garaitu. Trinketean aritu ziren lau pilotariek jokatu dute: German Elkorok eta Edorta de Antak euskal selekzioan, eta Dorian Navarro frantziarrak eta Maxime Cabanne lapurtarrak Frantzian. Emaitza, ordea, kontrakoa izan da. Vianney Martin eta Jordy Godoy lapurtarrena ere bada urrea, eta Beñat Lizasorena eta Sergio Rodriguezena ere bai zilarra.
Nazioarteko Federazioaren egoitza, Miarritzen
Bestalde, Nazioarteko Euskal Pilota Federazioak azken orduko aldaketa bat egin du, eta haren egoitza nagusia Miarritzen (Lapurdi) egongo da, eta ez Buenos Airesen, asteazkenean egindako urteko batzar orokorrean onartu zen bezala. Arrazoia da Argentinak uko egin diola egoitza izateari. Hain zuzen, ezusteko bat izan zen batzar orokor horretan. Izan ere, aurretik zuzendaritza batzordeak onartu egin zuen egoitza Iruñetik Miarritzera lekualdatzea, eta batzar nagusian erabaki hori berresteko bozketa egin behar zen. Baina, Espainiako Federazioaren abstentzioa tarteko, Buenos Airesen hautagaitza gailendu zitzaion Miarritzekoari, aldeko 43 boto lortuta, Miarritzekoak baino hiru gehiago. Hala ere, Pablo Lambardi Argentinako Pilota Konfederazioko presidente eta Nazioarteko Federazioko idazkari nagusiak gaur esan du «lanean» ari direla egoitza Miarritzen egon dadin. Horrela, egoitzak Euskal Herrian jarraituko du.