Euskal selekzioak erakustaldia egin du Munduko Wallball Txapelketan, Leeuwarden (Herbehereak). Bost mailatan aritu da, eta lautan nagusitu: lau urre eta hiru zilar lortu ditu. Olatz Arrizabalaga eta Mikel Beldarrain gailendu dira banakako lehian. Arrizabalagak Miren Larrarteri irabazi dio finalean: 21-16, 3-21 eta 11-6. Beldarrainek, berriz, Egoitz Amantegi hartu du mendean: 21-10 eta 21-19.
Binaka eta bikote mistoetan ere nagusi izan da euskal selekzioa. Ziarrustak eta Beldarrainek 21-19 eta 21-10 irabazi diete Luke Thomson eta Christian Blackaby britainiarrei, eta Ziarrustak eta Larrartek, 21-19 eta 21-15 Jurrit Osinga eta Marrit Zeinstra herbeheretarrei. Larrartek eta Arrizabalagak, ordea, galdu egin dute Marrit eta Hiske Zeinstra Herbehereetako ahizpen kontra: 21-14 eta 21-12.
Wallballeko lehiaketa bateratu bat egin duten lehen aldia da. Esku Pilotako Nazioarteko Konfederazioak antolatu du, eta zazpi herrialdek hartu dute parte: euskal selekzioak, Argentinak, Belgikak, Erresuma Batuak, Valentziak, Herbehereek eta Puerto Ricok.
