Ez da jokatu Kontxako badian Euskotren ligan jokatzekoa zen erabakia. Soka luzea utziko duen erabakia izango da, eta galdera asko utziko dituena. Izan ere, hasiera batean Traineruen Kluben elkarteak adierazi du jokatu egingo zela. Ondoren, ordezkariek bilera egin dute, eta bertan zeudela entrenatzaileekin batera erabaki dute ez lehiatzea. Bazirudien bertan behera geratuko zela. Baina San Juango eta Donostiarrako ontziak arrapalan geratu dira. Bi klub horiek batzorde teknikoaren behin betiko erabakiaren zain geratu dira. 17:50ean jakinarazi behar zuen azkenean estropada bertan behera geratu zen edo ez. Bazirudien bi ontzi horiek lehiatu egingo zirela, eta erlojuaren aurka izango zela. San Juango arraunlariak itsas eremuan ere sartu dira, baina gero bueltatu egin dira. Azkenerako batzorde teknikoak bertan behera utzi du estropada «ontziak azaldu ez direlako».
Eguraldi iragarpena txarra zen gaur Donostian arratsalderako. Itsas eremua hala joan da okertzen: olatu ugari eta haize asko zegoen. Arraunlariak badiara iritsi direnerako jabetu dira horretaz. Hala adierazi dio BERRIAri Naroa Leonetek, Tolosaldeako arraunlariak. «Espero baino okerragoak ziren». Dena den, Borja Rodrigo TKEko buruak ETBri adierazi dio «momentuz» jokatu egingo zela. 15:45ak ziren. «Une honetan hori da erabakia. Baina ordezkarien bilera 16:00etan da, eta estropadak 17:15ean hasten dira. Ikusiko dugu zer gertatzen den hemendik ordura bitarte».
Ordezkarien bilera normaltasunez egin da, eta kaleak ere zozketatu dituzte. Baina Euskotren ligako ontzietako zortzi entrenatzaileetatik zazpi bildu egin dira, eta «aho batez» erabaki dute estropada ez jokatzea. Ibon Urbieta Donostiarrako entrenatzailea ez da bileran izan, baina beraiek ez zirela aterako esan du. Zigor Gazpio Orio ordezkariak nabarmendu du erabakia «aho batez» hartu dutela. «Arrapalatatik ateratzeko ere zailtasunak daude, eta arraunlarien ziurtasuna lehenetsi dute zortzi entrenatzaileek. Emandako batasun irudi hori nabarmendu nahiko nuke. Arraunlarien segurtasuna bermatu nahi izan dugu».
Bazirudien ontzi guztiek etxerako bidea hartuko zutela. Arraunlariak ere arrapalan zeuden, kaleko arropa jartzen. Baina orduan hasi dira nahasten gauzak. Izan ere, San Juango eta Donostiarrako arraunlariak eta ontziak zain geratu dira, batzorde teknikoaren behin betiko erabakiaren zain. 17:50erako ziren ematekoak. Zabaldu denez bi ontziak prest ziren erlojuaren aurka lehiatzeko. San Juango arraunlariak ere uretara sartu dira. Baina gero atzera egin dute, azaldu dutenez epailerik ez zegoelako. Epaileek, ordea, ukatu egin dute hori, eta bertan zeudela esan dute. Azkenerako Donostiarrako ontzia ez da uretara sartu. 18:00ak pasatxo zirela eman du batzorde teknikoak estropada bertan behera uzteko erabakia.
Egoera oso nahasia izan da, tentsio handikoa. Eusko Label ligako estropada jokatzen ari zela hitz egin du ETBn berriz gaiaz Rodrigok. «Guk hasieran ez dugu estropada bertan behera utzi, uste genuelako baldintzak egokiak zirela. Kale zozketa ere egin da. Baina gero ikusi da zein zailtasun zeuden hasteko. Teknikoki ere zaila zen egoera, eta erlojuaren aurka jokatzea ere aztertu dugu. Baina azkenerako, egoera ikusita, eta jada aurreikusitako hasiera ordutik ordu erdi igarota zegoela, teknikoki bertan behera uztea erabaki dugu». Entrenatzaileen erabakia ulertzen duen galdetuta, hauxe esan du. «Ulertu eta errespetatu bai, beste gauza bat da partekatzen dudan. Ez naiz hori baloratzera sartuko. Guk erabaki bat hartu dugu baldintzen inguruan, eztabaidatu zitekeen jokatzeko moduaren inguruan»
