Denboraldi amaieran garesti ordaindu ohi diren puntu horietakoak utzi ditu bidean gaur Athleticek, San Mamesen. Sailkapen nagusian azken tokian zegoen taldea hartu dute zuri-gorriek: Elx. Hori aski ez, eta jokoan nabarmen agindu dute hasieratik; baina ez dira gai izan hiru puntuak lortzeko. Gol aukera batzuk sortu arren, lehen zatian barkatu egin du Edin Terzicen taldeak, eta bigarrenaren hasieran aurrea hartu du Elxek, penaltiz sarturiko gol bati esker. Lanaren ekinez, berdinketaren gola sartu dute etxekoek, Iñaki Williamsek sarean sartu baitu baloia, 80. minutuan. Gol horri esker, itxaropena zabaldu da harmailetan, baina etxeko taldeak ez du beste golik sartzeko gaitasunik izan. Puntu bakarrak hotz utzi ditu San Mamesen bildutako jokalari zein zaleak, eta, azken asteotan sortu den ilusioaren ondoren, kolpe latza hartu dute. Izan ere, garaipenak gora begira jarriko zukeen Athletic.
Hasierako hamaikakoari dagokionez, azken jardunaldiko taldeari jarraipena eman dio Terzicek. Ez du jokalari bakar bat bera ere aldatu, eta taldeak ongi funtzionatu du hastapenean. Presio itogarririk egin gabe, baloia bere egin du Athleticek, eta nahierara jokatu ahal izan du. Hori bai, zelaiaren hiru laurdenetatik aurrera kalitatea eta inspirazioa falta izan ditu. Garai bateko mamuak berriro agertu dira bisitan San Mamesen. Atzean ongi kokatu ohi den talde baten kontra nahi eta ezin ibili dira zuri-gorriak, gol aukera garbiak sortzea ere kosta egin baitzaie. Elxek ez du erasora ateratzeko arriskurik erakutsi ere egin, baina etxekoek ez dute nagusitasuna markagailuan islatu. Iñaki Williamsek pare bat aukera izan ditu gola sartzeko, baina antzu aritu da ate aurrean. Robert Navarro ere agertu da erasoan, baina haren jaurtiketa kanpora joan da, langa ukitu eta gero.
Bigarren zatiari begira, bazirudien denbora kontua izango zela etxekoek lehen gola sartzea. Futbolean barkatzen duenak garesti ordaintzen duela dio esaerak, eta halaxe gertatu da. Jokaldi korapilatsu baten ondoren, Aresok penalti argia egin dio Elxeko jokalari bati, eta epaileak ez dio barkatu. Bounanottek ederki asmatu du penalti puntutik. Gol horrek goitik behera aldatu du neurketaren joera, eta minutu batzuez bere onera etorri ezinda jardun da Athletic. Bisitariek maisuki asmatu dute lehiari erritmoa mozten, eta Terzicen jokalariei patxada gehiago falta izan zaie. Jokoz ere nagi agertu dira zuri-gorriak. Sanceten parte hartze handiagoa falta izan du taldeak.
Egoera ikusirik, zuhaitza astindu du entrenatzaileak, eta hiru aldaketa egin ditu denbora gutxian. Besteak beste, Alex Berenguer zelairatu da, eta hura izan da pizgarria. Eskuin hegaletik etengabe saiatu da Elxen areara gerturatzen, eta 80. minutuan iritsi da banakoa, Berenguerren erdiraketa bat Iñaki Williamsek leun ikutu ostean. Nico Williamsek eta biek egindako jokaldiari esker, Berenguerrek itxaropena ekarri du zelaira. Azken minutuetan bihotzez aritu da Athletic, eta sortu ditu pare bat aukera on, baina azkenean berdinketarekin konformatu behar izan du. Penaz egoteko astirik gabe, datorren partidari begira jarri behar dute bilbotarrek, Levanteren zelaian jokatu beharko baitute datorren asteazkenean.
ATHLETIC. Unai Simon; Areso (Johaneko, 65. min), Yeray, Laporte, Yuri; Ruiz de Galarreta (Jauregizar, 65. min), Gerenabarrena; Robert Navarro (Berenguer, 72. min), Sancet, Nico Williams; eta Iñaki Williams (Maroan, 81. min).
ELX. Dituro; Buba Sangare, Redondo, Chust, Revivo; Villar (Neto, 82. min), Morcillo, Valera (Cepeda, 82. min), Tete Morente (Ruben Sanchez, 75. min); Buonanotte (Lemar, 69. min) eta Fer Niño (Osorio, 69. min).
Golak. 0-1: Bounanottek, penaltiz (50. min). 1-1: Iñaki Williamsek (80. min).
