Maradonak 1986an bezala, Messik ere izango du Ingalaterraren aurka partida gogoangarri bat jokatzeko aukera Munduko Futbol Txapelketan. Ingalaterra eta Argentina finalerdietarako sailkatu dira, ozta-ozta, eta asteazkenean elkarren kontra izango dute Atlantan (AEB), 21:00. Luzatu egingo da, beraz, bi herrialde horien arteko lehia partikularra.
Lau aldiz jokatu dute elkarren kontra bi taldeek Munduko Txapelketan. 1962an, Txilen, 3-1 irabazi zuten Ingelesek multzoen fasean. Lau urte geroago, Ingalaterrean, etxeko selekzioa nagusitu zen final-laurdenetan. Tentsio askoko lehia, baina, 1980ko hamarkadatik aurrera sortu zen, 1982an bi herrialdeak Malvinetako Gerran elkarren kontra aritu zirenez geroztik. Argentina izan zen galtzaile gerra horretan. Horregatik 1986ko Munduko Txapeketan, Mexikon, final-laurdenetan jokatu zuten partida estatu kontu bat bilakatu zen. Hura izan zen Maradonaren munduko txapelketa. Bi gol sartu zituen, eta Argentinak 2-1 kanporatu zuen Ingalaterra final-laurdenetan. Lehen gola eskuarekin sartu zuen, eta jainkoaren eskua gisara ezagutzen da, eta bigarrenean baloia bere zelaian hartu, bost jokalari ingelesi iskin egin eta gola sartu zuen; mendeko gola gisara ezagutzen da hori, eta FIFAk 2001ean XX. mendeko gol onena izendatu zuen. Gary Linekerrek sartu zuen ingelesen gola, baina 2-1koarekin Argentinak egin zuen aurrera, eta txapelketa irabazi zuen gero finalean, Alemania Federalaren aurka irabazita.
Beste bi partida jokatu dituzte bi taldeek harrez geroztik, 1998an eta 2002an. Lehenengoan, Frantzian, bina berdindu zuten final-zortzirenetan, eta Argentinak irabazi zuen penaltietan. Bigarrengoan, Hego Korean, 1-0 gailendu zen Ingalaterra, multzoen fasean.
Datorren asteazkenean jokatuko dutena, baina, berezia izango da. Zelaian Leo Messi izango delako, eta azken urteetan behin eta berriz alderatu dituztelako Diego Armando Maradona eta bera, bai Argentinan baita handik kanpo ere. Aparteko jokalaria izanagatik, Messi behar zuen Munduko Kopako garaikurra Maradonaren parean jarri ahal izateko, eta duela lau urte Qatarren lortu zuen. Orain bietatik onena zein den eztabaida erabakitzeko beste aukera bat du, baldin eta Maradonak Ingalaterraren aurka 1986an jokatu zuenean bezain erabakigarria baldin bada partida horretan. Amaituko al da eztabaida?
Ez du erraza izango. Ez behintzat Argentinak azken bi partidak nola irabazi dituen ikusita. Egiptoren aurka, final-zortzirenetan, 92. minutuan sailkatu zen, eta gaur goizaldean luzapenaren bigarren zatira arte ez du lortu Suitza menderatzea. Txapelketa honetan, gainera, lehen aldiz golik sartu gabe amaitu du partida. Mac Allisterrek sartu du lehena, Messiren pase baten ostean, 10. minutuan. Argentinarrek estuasunik ez zutela pasako ematen zuen, baina 67. minutuan Ricardo Rodriguezek berdin du, eta Egiptoren aurkako partidako mamuak agertu dira berriro. 90 minutuan amaituta, luzapena jokatu da. Azkenean Julian Alvarezek sartu du partida desorekatu duen gola, 112. minutuan, eta partida amaieran egin du Lautaro Martinezek hirugarrena.
Ingalaterrak ere gorriak ikusi ditu. Norvegiaren aurka galtzen hasi dira: Schjelderupek sartu du lehen gola, Odegaarden pase bati esker. Partidako izarra, baina, Bellingham izan da: bi gol sartu ditu, biak ere lehen zatiaren eta bigarren zatiaren amaieran. Alexander Sorloth Realeko jokalaria hasierako hamaikakoan zelairatu da.
