Azken orduetan jakin da, baina egunak dira Oscar Guerrero Zelaia Israel Premier Tech taldeko kirol zuzendariak etxerako bidea hartu zuela. Atzo, Rueda eta Guijuelo (Espainia) artean jokaturiko etapan ez zegoen taldearen autoan, eta COPE irratiaren arabera, Altsasura (Nafarroa) itzulia zen, familiarekin egotera.
Altsasun jaio zen Guerrero 1971. urtean. Hainbat taldetan aritu da, besteak beste Caja Rural, Kaikun, Fuertaventura Canarias eta Euskaltel-Euskadin, eta Israelgo taldea zuzendu du 2017. urtetik.
Israel Gazan egiten ari den genozidioak eragindako protestekin ezinegona adierazi izan du azken egunotan Guerrerok. «35 urte dira zuzendari nabilela. Bizitza osoan jo eta ke lanean, eta jendeak autoko leihotik hiltzaile edo putakume deitzea ez da atsegina, eta mintzen zaitu. Uste handia daukat organizazioa eta poliziarengan. Ez dago beldurrik. Badakigu zarata handia egongo dela, baina etapari aurre egingo diogu», esan zuen, irrati horretan, Bilbon amaitu behar zuen etaparen aurretik. Protestengatik, Vueltak ezin izan zuen etapa amaitu. Ordutik, beste hainbat protesta egin dituzte taldearen aurka. Galizian jokaturiko beste etapa bat behar baino lehenago amaitu behar izan zuten, eta Valladoliden (Espainia) jokaturiko erlojuz kontrakoa laburtu.
Espainiako Ciclo21 txirrindularitza atariak zabaldu duenez, mezuak margotu dituzte Guerreroren etxe inguruan, Altsasun.
Sylvan Adams milioidun kanadarrak sortu zuen Israel Premier Tech taldea. Israelgo lehen ministroaren adiskidea da Sylvain, eta txirrindularitzaren bidez herrialdearen izena zuritzeko ahalegina egitea leporatu diote. Netanyahuk berak sostengua adierazi dio taldeari azken egunotan: «Israel harro dago zuekin, idatzi du».
Israel Premier Tech taldeko zuzendari nafarrak Vuelta utzi du
Oscar Guerrero altsasuarrak ezinegona adierazi izan du lasterketan talde israeldarraren aurka egin dituzten protestak direla eta
Iruzkinak
Ez dago iruzkinik
Ordenatu
