Iraultza Osasunan: Luis Miguel Ramis entrenatzailea kargugabetu du klubak, eta Jagoba Arrasate Sadarrera itzuliko da. Atzo 5-2 galdu zuen Betisen aurka.
Ramisek Ligako zortzi partida zuzendu ditu Osasunarekin: bi irabazi ditu, bi berdindu eta lau galdu. Hamaseigarren da ligan, azken bost partidetan puntu bakarra lortu zuen.
Arrasate, ordea, lanik gabe zegoen iazko otsailetik. Berriatuako (Bizkaia) entrenatzaileak Osasuna zuzendu zuen 2018tik 2024ra arte. 2019an Lehen Mailara igo zuen talde nafarra, eta 2023an Espainiako Kopako finalera eta Konferentzia Ligako atarikora iritsi zen. 2024an Mallorcara joan zen, eta urte eta erdi egin zuen han.
Jagoba Arrasatek pasa den astean hitz egin zuen BERRIArekin. Osasunara itzultzeari buruz zera esan zuen: «Catarekin [Cata Prietorekin, Osasunako kirol zuzendariarekin] oso harreman ona daukat. Nik atea irekita utzi nuen, eta haiek ere bai. Noizbait itzultzen banaiz, modu naturalean izango da, bi aldeek elkarren beharra sentitzen dugunean».
