Javier Ruiz de Larrinaga eroso nagusitu da Ormaiztegiko lasterketan

Javier Ruiz de Larrinagak (MMR Lizarte) ez zuen hutsik egin herenegun Ormaiztegiko 40. ziklo-kros lasterketan, eta azkenaldiko bolada txarrari amaiera eman zion. Hura zen irabazteko hautagairik garbiena, eta eroso nagusitu zen. 59 minutu eta bost segundo aski izan zituen helmugako marra zapaltzeko. Hirugarren itzulian ihes egin; ongi eutsi zion jarritako erritmoari, eta bakarrik helmugaratu zen. Denboraldiko 10. lasterketa irabazi zuen arabarrak. Bigarren, Iñaki Lejarreta (Orbea) izan zen, 44 segundora; eta, hirugarren, Aitor Hernandez (Spiuk), minutu eta 55era.

Faborito garbia zen Larrinaga, baina ez zuen espero hain erraz irabaziko zuenik, batez ere aspaldian bere onena eman ezinda zebilelako. Ormaiztegin, baina, bestelako itxura bat eman zuen. Hasieratik erritmo oso bizia ipini zuen, eta laster geratu zen bakarrik lasterketaren buruan. Inork ezin izan zuen jarraitu irabazlearen gurpila. Ibilbidearen egoera egokia zela aitortu zuen Larrinagak proba amaitu berritan. Hernandezen erorikoak ere dezente baldintzatu zuen lasterketa. Lurrera jauzita min hartu zuen sorbaldan hirugarren sailkatuak, eta zeukan guztia eman ezinda itzuli zen etxera.

Ormaiztegiko garaipenak, zalantzarik gabe, konfiantza handia emango dio Larrinagari Espainiako Txapelketan aritzeko. Igande honetan izango da Zamoran, eta arabarrak postu ona eskuratzea espero du.

Murgoitio, Belgikatik bueltan

Egoitz Murgoitiok (Hirumet) Belgikan egin ditu Espainiako Txapelketa prestatzeko lanak, eta etxean da dagoeneko. Lau lasterketatan hartu du parte; azkena herenegun jokatu zen Tervurengo proban, eta 34. postuan helmugaratu zen. Murgoitioren helburua aurreko lasterketetan egindakoa hobetzea bazen ere, ez zuen lortu. Izan ere, bigarren proban hamahirugarren izan zen. Zapore gazi-gozoarekin amaitu du Belgikako bira euskaldunak, baina konfiantzaz beterik dago asteburuan Zamoran jokatuko den txapelketarako.