Bolo-bolo zebilen haren izena, eta gaur baieztatu da berria: Victor Muñozek Osasuna utzi du, eta Liverpoolen jokatuko du aurrerantzean. Ingalaterrako taldeak jokalari kataluniarraren etete klausula ordaindu du, 40 milioi euro, eta sei denboraldiko kontratua adostu du harekin.
Osasunak iaz fitxatu zuen Victor Muñoz Real Madriletik, bost milioi euroren truke, baina haren eskubideen erdia bakarrik erosi zuen, hau da, talderen batek hura fitxatuz gero, Osasunak eta Real Madrilek hogeina milioi euro jasoko zituzten. Hala ere, talde gorritxoak inoiz ez zuen horrenbeste diru jaso jokalari batengatik. Raul Garciarena zen salmentarik handiena orain arte: Atletico Madrilek hamahiru milioi euro ordaindu zizkion Osasunari 2007an.
Victor Muñozek denboraldi bat besterik ez du egin Iruñean, baina nahikoa izan da haren kalitatearen berri emateko. Hura izan da taldeko jokalaririk onena, alde handiz. Espainiako Liga eta Kopa kontuan hartuta, 36 partida jokatu ditu, 31 hasieratik, eta zazpi gol sartu ditu. Lan bikain horri esker, talde handi asko zituen haren atzetik. Hasieran, bazirudien Newcastlek fitxatuko zuela, baina Ingalaterrako beste talde batek bereganatu du azkenean: Liverpoolek. Victor Muñozen salmentari esker, Osasunaren diru kutxak lasaitua hartuko du.
