Alessio Liscik badu ordezkoa Osasunaren aulkian: Luis Miguel Ramis. Klubak ohar baten bidez eman du albistea. Prestatzaileak bi denboraldirako sinatu du talde gorritxoarekin, eta gaur arratsaldean aurkeztuko dute Sadarren. Azken denboraldian Bigarren Mailan aritu da entrenatzen, Burgosen. Ramis bere entrenatzaile multzoarekin batera iritsiko da: Jose Manuel Gil eta Iban Maroño entrenatzaile laguntzaileak, Miguel Angel Fernandez prestatzaile fisikoa eta Jose Fajardo analista.
Liscik ez zuela jarraituko jakin zenetik, zenbait entrenatzaile aipatu dira Osasuna zuzentzeko. Carles Martinez izan zen aurrenekoa. Baina Okzitaniako Tolosako taldea utzi ondoren, Bayer Leverkusenek fitxatu du. Jose Bordalasen aukera ere hor egon da. Ezusterik ezean, ordea, datozen orduetan Getaferekin luzatuko du kontratua. Azkenerako, Braulio Vazquez kirol zuzendariak Bigarren Mailako entrenatzaileen merkatuari erreparatu dio, eta Ramisen alde egin du.
Ramis Tarragonan (Herrialde Katalanak) jaioa da, eta 56 urte beteko ditu uztailaren 25ean. Aurrenekoz arituko da Lehen Mailan entrenatzaile, baina eskarmentu handia du Bigarren Mailan, azken hamar denboraldietan bertan aritu baita. Esan bezala, azken denboraldian Burgos zuzendu du, eta taldea Lehen Mailara igotzeko kanporaketak jokatzear egon da. 72 puntu eskuratu ditu, eta zazpigarren amaitu du, Castello seigarren sailkatuarekin berdinduta. Hura izan da kanporaketak jokatu dituen azken taldea. Ramisek azken denboraldian Burgosen egindako lanaren inguruan, hauxe dio Osasunaren oharrak: "Taldeari oreka eman dio taktikoki, eta oso lehiakorra izan da. Gol gutxien sartu dioten taldea izan da, partida gutxien galdutakoetan hirugarrena, eta garaipen gehien lortutakoetan seigarrena".
Jokalari moduan hainbat taldetan aritu zen: Tarragonako Nasticen, Real Madrilen, Tenerifen, Sevillan, Coruñako Deportivon, Ferrolgo Racingen... 2005-2006 denboraldian hartu zuen erretiroa. Ondoren hasi zen entrenatzaile lanetan, Real Madrilen harrobian. Metodologia arduradun ere izan zen. Real Madrilen gizonezkoen bigarren taldea izan zen zuzendu zuen lehen taldea, 2016ko denboraldian. Zinedine Zidaneren tokia hartu zuen. Hurrengo denboraldian Almeriak fitxatu zuen. Hamabi jardunaldi falta ziren Bigarren Mailako denboraldi amaitzeko, eta Espainiako taldea azken-aurreko postuan zegoen sailkapenean. Ramisen eskutik zazpi partida irabazi, bat berdindu eta lau galdu zituen, eta mailari eustea lortu zuen.
2018-2019 denboraldian Albacete zuzendu zuen, eta denboraldi bikaina egin zuen. Izan ere, laugarren amaitu zuen liga, eta igoera kanporaketak jokatu zituen. Gainera, gol gehien sartu zuen taldea izan zen, Osasunaren atzetik. Gorritxoak Lehen Milara igo ziren; Albacete, berriz, ez. 2021-2022 denboraldian beste igoera kanporaketa batzuk jokatu zituen; orduko horretan, Teneriferekin. Orduan, Ramisen taldea atzean izan zuen sendotasunarengatik nabamendu zen. Izan ere, 0,85 gol sartu zioten partidako. Baina berriro ere ez zuen egin Lehen Mailarako urratsa. Espanyoli partida batzuk zuzendu eta gero, Burgosek fitxatu zuen 2024-2025 denboraldiren erdialdean. Burgos estu zebilen, baina azkenerako aise lortu zuen mailari eustea. Hamar punturen aldea atera zien jaitsiera postuetakoei, eta denboraldi honetan segida eman dio lan on horri. Orain Osasunak eman dio Lehen Mailan entrenatzeko aukera.
