Duela zenbait astetatik amaituta zeuden dortsalak. Emakumezko 6.500 korrikalarik hartu dute parte Lilatoiaren 36. aldian, eta, izerdia botatzeaz gain, aldarrikapenez bete dituzte Donostiako kaleak. Helmugan Mikele Zurutuza legazpiarra izan da azkarrena, 18 minutu eta 34 segundoko denbora eginda; Itziar Ibarbiak amaitu du bigarren, eta Maitane Guerrerok hirugarren.
Bost kilometroko ibilbidea osatu dute lasterkariek, eta milaka lagunek animatu dituzte errepide bazterretatik, Donostia erdialdean, Gros auzoan eta bulebarrean. Eguraldia lagun izan dute, eta ez dira falta izan aldarrikapenez betetako pankartak, kartelak eta kamisetak.
Izan ere, antolakuntzak gogorarazi du Lilatoia ez dela lasterketa bat soilik: «Feminismoaren aurrerabidearen ospakizun bat da, emakumeok edozein erronka konkistatzeko dugun gaitasunaren eta ausardiaren etengabeko gogorarazpen bat».
Jaio zenetik, izugarri hazi da lasterketa: 1990. urtean 190 emakumek hartu zuten parte, iaz 6.235ek, eta aurten 6.500ek.
