Oriok kolpea eman du Zierbenan (Bizkaia). Atzo Urdaibaik aurrea hartu zion Bilbon, baina gaur amorratuta atera da San Nikolas, eta lehen paladetatik izan da nagusi ohorezko txandan. Gertu izan duen talde bakarra Getaria izan da, bigarren txandako garailea.
Estropada ederra jokatu dute traineruek. Barruranzko luzeetan olatu mordoxka hartu dituzte patroiek, ikuskizun bikaina eskaini diete arraunzaleei, eta emaitzetan ere izan dira ezustekoak.
Ohorezko txandan, Gorka Aranberri patroiak esan duen moduan, basurdeen moduan atera dira Oriokoak. Hasierako txanpan jada ontzi batetik gorako errenta atera diete arerioei, horri eutsi diote ziabogara arte, eta itzulerako luzean tartea handitu dute, olatuak baliatuta.
Estropadaren bigarren erdian, beste hainbeste: azkenean, Bermeori 13 segundo atera dizkio Oriok, Zierbenari 18 eta Donostiarrari 30.
Ezusteko ugari
Bigarren tandan Getaria eta Hondarribia izan dira olatu artean ondoen moldatu direnak, eta, horri esker, laugarren amaitu du Ama Guadalupekoak, eta bigarren Esperantzak, Oriorengandik bost segundo eskasera.
Aipatzekoak dira Ondarroaren seigarren postua eta Chapelaren zazpigarrena ere, eta, txaponaren beste aldean, Donostiarraren bederatzigarrena.
