Ez da giro izan gaur Bueun, Galizian. Eusko Label ligako traineruek ez dute izan ez abuztu ez uda girorik, behintzat. Itsasoa bare zegoen, baina haize ufadak eta lanbroa izan dira nagusi, gehienbat kanpoko balizetan. Halere, Oriok hartu du esperotako berotua, eta bere egin du estropada.
Gaurkoaren ondoren, oriotarrek hamahirugarrenez lortu dute garaipena denboraldi honetan, eta, orain arte bezala jarraituz gero, bihar bere historiako bigarren liga irabaziko lukete. Hain zuzen, hori dute helburu, Xabier Manrike Orioko ordezkariak adierazi duenez: «Oraintxe ligan dugu burua, eta aurrerago begiratuko diogu Kontxari». Faboritoak dira Kontxako Bandera irabazteko.
Pontevedrako itsasadarrean, oriotarrek eta Zierbenak denbora berean eman dute lehen ziaboga; bigarrenean, Zierbenak segundo bakarragatik hartu die aurre; eta hirugarrenean, San Nikolas ontziak sartu du branka berriro. Amaieran, Zierbena bi segundo geroago heldu da.
Urdaibai hirugarren izan da estropada guztian zehar, eta hala bukatu du, Zierbenako galipo-ak baino hamazazpi segundo atzerago. Donostiarrak denbora asko galdu du estropada hasieratik, eta hala segitu du gero ere. Estropada hasieran, bigarren txandako Getariak denbora hobea egingo zuela zirudien, baina ez du lortu: bihar donostiarrak arituko dira ohorezko txandan.
Irteera azkarra eman dute bigarren txandan, haizea gorabehera. Bi estropada ezberdin egon dira, nabarmen: batetik, Hondarribia eta Getaria; bestetik, Isuntza eta San Juan.
Hondarribiak eta Getariak lehia estua izan dute ia norgehiagoka osoan, baina bigarren ziabogatik aurrera getariarrek gogor eman diete arraunei, eta hamar segundoren aldea atera diete hondarribiarrei. Hain zuzen, tarte hori baliatu du Ondarroak sailkapenean seigarren geratzeko, lehen txandatik, getariarrengandik, lau segundora.
Ondarroa, seigarren
Ondarroa indartsu atera da bere txandan, eta handitu egin du tartea estropadak aurrera egin ahala. Hori bai, nabaritu du haizearen eragina: itzultzeko joateko baino minutu bat eta hamar segundo gehiago behar izan dituzte ondarroarrek.
Traineru gehientsuenetako patroiak makurtuta ibili dira traineruaren brankan, haizeari ihes egin nahian. Batzuetan, orduko 37 kilometroko abiaduran aritu da haizea. Biharko ufada indartsuagoak espero dira Aresen.
Hain zuzen, bihar etxean arituko den Aresek eta Kaikuk gaur bigarren txandako Isuntzak baino denbora hobea egin dute. Ika-mika ibili dira bi traineruak, aurrea nork hartuko: pare bat segundoren aldea izan dute lehia guztian. Hasieran, galiziarrak joan dira aurretik; gero, bizkaitarrek hartu diete aurrea; baina, azkenerako, galiziarrek jakin dute azken txanpa azkarrena egiten.
Atzerago heldu dira Isuntza eta San Juan. Arrosek aurrea hartu diete lekeitiarrei momenturen batean, baina ez luzaroan: estropada erditik aurrera, atzetik aritu da Erreka ontzia.
Cabok asko du jokoan: gaurko eta biharko estropadaren ondoren zuzenean gal lezake Eusko Label ligako maila. Fin ibili da hasieran, Kaiku utzi baitu atzetik, baina segundo gutxira. Lehen luzearen ondoren, baina, ezin izan dio eutsi, eta azken postuarekin konformatu behar izan du.
Liga ez da oraindik amaitu, baina azken bi jardunaldiak baino lehen Kontxako Banderaren sailkatze estropadak eta bi jardunaldiak izango dituzte traineruek. Irailaren 7an eta 14an jokatuko da bandera preziatua, beraz. Astebete geroago, ligako azken bi jardunaldiak izango dituzte, Bermeon eta Portugaleten (Bizkaia). Bide batez, orduan jokatuko dituzte kanporaketa estropadak Euskotren eta Eusko Label ligetako apalenek, KAE1 eta ETE ligako azkarrenen eta Galiziako talde azkarrenen kontra.
Gaur izan zuten KAE2 mailakoek lehen kanporaketa jardunaldia Portugaleten; Hibaikak irabazi du. Bihar jokatuko dute bigarren jardunaldia, Castro Urdialesen (Espainia), 11:00etan.
