Oriok irabazi du gaur Zarauzko Banderako lehen jardunaldia. Hasi eta buka nagusitu da San Nikolas ontzia, eta denboraldiko hamahirugarren bandera irabazi du. Bigarren, Zierbena izan da, hamar segundora, eta Urdaibai izan da hirugarren, hamalaura.
Euskotren ligako estropadatik itsasoa harro zegoela ikusi da. Ondorioz, kaleen aferak zeresana izan du gaur, eta patroiek zirt edo zart hartu behar izan dituzte zenbaitetan. Orio hasieratik jarri da estropadaren buruan. Erregularra izan da estropada osoan, eta, lortutako aldearen ondorioz, Gorka Aranberri San Nikolas ontziko patroiak aukera eduki du nahi izan duen kalera joateko.
Etxeko estropada irabazi eta gero, pozik zegoen Orioko patroi zarauztarra: «Gustura gaude. Gure kaletik estropada ona egitea lortu dugu». Jokoan zeuden urrezko hamabi puntuak Oriok eskuratu baditu ere, bihar erabakiko da norentzat izango den Zarauzko Bandera (12:20, ETB1). Oriok hamar segundoren aldea badu ere, Aranberri ez da fio: «Askotan gertatu izan zait lehenengo estropada aldearekin irabazi eta hurrengo egunean galtzea. Bihar ere irabaztera etorriko gara».
Zierbena eta Urdaibairen artean ere mokoka aritu dira. Estropadaren zatirik handienean, Jon Salsamendiren taldea aurretik izan da, eta, gainera, Orioren gainean egotea lortu du tarte luze batean. Halako batean, baina, epaileak zuzentzeko agindua eman dio Bou Bizkaia ontziari, eta une hori baliatu du Aitor Lazkano Zierbenako patroiak tartea handitzeko.
Bigarren txanda Donostiarrak gobernatu du, goitik behera. Igor Makazagaren taldea laugarren izan da sailkapenean, eta hasiera-hasieratik estropada serioa egin du. Denetik izan du Donostiarraren denboraldiak, baina azken asteetan, erregulartasuna lortzearen ondorioz, nagusi da bigarren txandan.
Hasieratik hartu du aurrea, eta ez du parekorik izan. Ondarroa atzean geratu da lehen luzetik, baina Hondarribiak eta Isuntzak lehia bizia izan dute. Ioseba Amunarrizek gidatutako traineruak bigarren postuari eustea lortu du estropadaren parte handi batean, baina Bizkaiko traineruak olatua hartu eta aurrea hartzea lortu du. Azkeneraino lehia bizia izan dute bien artean, baina Markel Akarregiren taldea aurretik izan da, eta, ondorioz, seigarren postua bereganatu du. Lerro zuzenetik jarraitzen du Lekittarra ontziak, eta lortzen ari den emaitzek konfiantza eman diezaiokete Kontxako Banderako sailkatzeko estropadari begira.
Behean, saltsa
Arratsaldea emankorra izan da Aresentzat. Santa Olalla ontziak irabazi du lehen txanda, eta, Chapela une oro atzetik jarraika izan badu ere, azkenerako Santurtzi izan da bigarren. Haren atzetik, Ares kanporaketak jokatzeko postuetan kokatu da, eta, Chapelari bi puntu ateratzean gain, bost puntura murriztu du San Juanekin zuen aldea. Juan Zunzuneguiren taldearentzat kolpe gogorra izan da gaurkoa. Une oro Santurtziren aurretik ibiltzea lortu badu ere, azken unean aurrea hartu dio Sotera-k, eta ondorioz bi puntu poltsikoratu ditu.
San Juanentzat, berriz, arratsalde makurra izan da. Joseba Fernandezek entrenatzen duen trainerua burua altxatu ezinik dabil, eta, gaurko estropadaren ondoren, garai kritikoan da. Gaurko emaitzaren ondorioz, beheko postuetako lehia bizirik dago, eta ikusi beharko da bihar zer gertatzen den. Datorren astean, Galizian jokatuko dira Eusko Label ligako estropadak. Estuasun gehiagorik ez igarotzeko, behean dauden taldeek ezinbestean asmatu beharko dute.
