Kirol arloan fin dabil Osasuna azken urteetan, eta baita ekonomiaren alorrean ere. Iruñeko klubaren bazkideek batzar orokorra egin dute gaur Baluarte jauregian, eta oniritzia eman diote zuzendaritza taldeak 2025-2026ko denboraldirako proposatutako aurrekontuari. Inoizko handiena izango da, 86 milioi eurokoa.
Lehen aldiz, online parte hartu ahal izan dute bazkideek, eta 156 izan dira aukera baliatu dutenak, lau bazkidetik bat. Botoa 432 lagunek eman dute: 279 izan dira baiezkoak, 97 ezezkoak, 54 zuriak eta bi baliogabeak.
Luis Sabalza presidenteak harro hitz egin du: «Osasunak zazpi denboraldi bikain egin ditu, kirol arloko kudeaketa bikainari esker. Hori ukaezina dela uste dut. Dena den, apalak izan behar dugu, eta ez dugu ahaztu behar nondik gatozen».
Iazko aurrekontua ere onartu dute gaur —aldeko 289 boto zenbati dituzte, aurkako 79, 51 zuri eta hamar baliogabe—; bi milioi euroren irabaziak izan zituen Osasunak iaz, eta Sabalzak gehitu du klubak 31,6 milioi euro ordaindu zituela zergetan, gehienak Nafarroako Foru Ogasunari. Azken hamar urteetan 210 milioi ordaindu ditu denera.
